Го посетив Тиволи во Копенхаген - божиќен пазар на кој ќе се исклучите од реалноста

Во целото сивило, црни вести и прогнози, ковид предвидувања, сите пробуваме да се исклучиме од реалноста. Ако постои едно место каде во моментов може да го направите тоа, дефинитивно се градините Тиволи во Копенхаген. Што треба да очекувате?

Божиќната атмосфера ќе ја почувствувате 10 пати посилно од кога било во животот, уште на самиот влез. Иако чини „мало богатство“ или околу 20-тина евра, вреди за секое однапред планирано и штедено денарче.

Темата во Тиволи градините се менува трипати во годината, а цел декември темата е: Божиќ.

Годинава поставени се огромни црвени срца каде и да се завртите, заедно со преку неколку милиони сијалички во стотици бои и форми.

Уживањето би требало да започне со греено вино со бадем и суво грозје, односно Gløgg или помалку алкохолна варијанта – топло чоколадо со малку Бејлис.

Откако ќе се стоплите со неколку голтки – шетањето почнува.

Помалку познат факт: Сите пијалаци се служат во пластични чашки, кои на крајот ги враќате во автомат, а за секоја рециклирана чашка ви се враќаат 5 круни, односно нешто над половина евро.

Новогодишни куќарки има насекаде, по кој пат и да фатите. Во дел се продава храна, слатки, во дел сувенири или топли капчиња, ракавици, шалови...

Од храната, би требало да пробате две работи – хамбургерот во Gasoline Grill и препознатливиот десерт – дански мини палачинки наречени Aebleskiver.

Ако за момент ја кренете главата, ќе сведочите на вресоци од адреналинскиот парк, односно од ролеркостерот кој не запира.

Во склоп на Божиќниот маркет е и адреналинскиот луна парк кој не се препорачува „на полн стомак.“

Има безброј накитени елки (нема да знаете со која попрво да се сликате), веројатно ќе сакате да направите фотка и со ретро рингишпилот, а има и бротчиња со сијалички во кои можете да се повозите по вода.

Одвојте и 10-тина минути за да изгледате едно светлечко шоу на фасадата од најдобриот ресторан во градот.

После неколку часовно шетање, сите седнуваат да се стоплат покрај запалените огнови и трупчињата наредени околу нив. Таму може да здивнете пред да ја продолжите новата тура разгледување.

Ќе се обидеме сето ова да ви го раскажеме низ најубавите фотки на Инстаграм. Но, не се задоволувајте со нив.

Ако некогаш имате шанса – декември е за патување во Копенхаген.

 

М. Д. | Црнобело