Јован Илиески: „За Нова година го посетив Истанбул - зошто на овој град му се враќам одново и одново?“

„Во Истанбул се чува традицијата, се прават баклави, се дише морски воздух. Овде златото е како леб, го има секаде. Мириса на историја и глава се лечи со чај. Овде шербетот има различна магија, овде се пешачи без крај.“

Јован Илиески (22), писател, психолог и иден гешталт психотерапевт, неодамна го посети Истанбул.

Тој вели дека е вљубен во овој град и му се враќа одново и одново.

Јован за CRNOBELO.com ги споделува впечатоците оттаму:

На Истанбул не може да не му се вратиш.

Доаѓам повторно. И повторно, и повторно. Се вратив во градот на Босфорот за да ја прославам новата година и да го започнам новото патување со нов роман и да ја најдам својата нова хероина.

А, зошто секогаш Истанбул е совршена идеја?

Архитектура, историја, уметност. Овде се чува традицијата, се прават баклави, се дише морски воздух. Овде светот се дели на сите култури, град на два континенти и ги дели само еден мост.

Азија го носи современиот свет, Европа - ориентот. Овде златото е како леб, го има секаде. Мириса на историја, на мир и војна и глава се лечи со чај. Овде шербетот има различна магија, овде се пешачи без крај.

Овде можеш да се изгубиш и да ти биде пријатно. Цените, ниски и прифатливи за сечие живеење, а сообраќајот совршен хаос во кои граѓаните успешно живеат. Автобусите и метроата се преполни, а не значат ништо, затоа што луѓе пеш одат да го доживеат градот.

Мириса на риба и школки, на брегот, но месечината над Босфор свети посилно од дневното сонце.

Истанбул никогаш не спие, тоа е тоа што најмногу ми се допаѓа во врска со градот. Истанбул нема своја туристичка сезона. Градот секогаш живее, секогаш е во метеж, секогаш се трча што побрзо до другиот тротоар.

Совршен избор за секој уметник да си ја најде својата инспирација.
Галата кулата, Топкапи сарајот, улицата Таксим, џамијата на Ортакој и Босфорскиот мост, замокот Долмабахче, сето тоа и многу повеќе.

Се вратив со полна инспирација за пишување.

С. С. | Црнобело