„Бев на свадба во Турција каде цела вечер се служеше само турски сладолед – се прави од козјо млеко и салеп, не се топи 72 часа“
Кахраманмараш нема многу туристи, па бев поканета дури и на свадба каде една тетка се обиде да ми го намести кумот. Интересно беше што немаше ниту пирошки, ниту главно јадење, туку само турски сладолед, кој е познат по тоа што не се топи. Да, оној сладолед од видеата на кои Турците прават мамки на туристите... А, што се случи со кумот...?
Кулинарската култура на Турција се состои од широк спектар на различни вкусови, а кога станува збор за десерти, може да се каже дека Турција е една од земјите со највкусни десерти. Сладоледот од Кахраманмараш е еден од вкусовите што се издвојува меѓу останатите.
Ако сте имале среќа да одите на прошетка низ Истанбул, сигурно ги имате видено продавачите на сладолед кои со комплицирани (или за многумина интересни) движења ги забавуваат клиентите кои нетрпеливо чекаат да го добијат тоа вкусно задоволство.
Сигурна сум и дека сте наишле на некое видео на социјалните мрежи каде што овој процес на продавање сладолед е прикажан. Ако не знаете за каков сладолед станува збор, тука сум да ви раскажам.
Пред многу години кога за првпат го посетив градот Кахраманмараш (кој се наоѓа во медитеранскиот регион во Турција), слушнав за овој вкусен сладолед или како што тие велат на турски: maraş dondurma.
Првата вечер кога пристигнавме го добивме овој сладолед за десерт. Беше во вид коцка, па очекувавме да го јадеме со лажица, но до чиниите имаше нож и виљушка.
Беше чудно, па затоа почекавме да видиме како ќе го јадат Tурците. И да, сладоледот не беше замрзнат, но штом го служат во чинија, треба да користиш нож и виљушка. Ни раскажаа дека не се топи дури до 72 часа.
Овој сладолед се прави од козјо млеко, шеќер, салеп (сладок пијалак направен од млеко во прав добиен од корени на орхидеи) и ароматична смола (која се добива од дрвото pistacia lentiscus).
Салепот и смолата му даваат растегливост и отпорност да не се топи, а уникатниот вкус го добива од млекото во комбинација со салепот.
Млекото го варат на 90°С, а потоа ги мешаат и останатите состојки и го оставаат да замрзне околу 6 до 7 часа на -6°С. И ете така, потоа уживаат додека го јадат и ги шармираат многуте туристи низ цела Турција.
Додека престојувавме во Кахраманмараш, исто така прошетавме и до соседните села за да се запознаеме со локалните жители. Таму можевме да видиме дека луѓето претежно се занимаваат со производство на козјо млеко.
Освен што пробавме вкусно природно млеко, нè послужија и со ајран (освежителен пијалак кој е сличен на нашиот јогурт), а прекрасните бабички кои беа собрани наоколу и подготвуваа ѓозлеме, не нè пуштија да си одиме без да го пробаме овој вкусен специјалитет.
Велат дека да одиш во Турција и да не пробаш ѓозлеме е грев, па така и ние не можевме да кажеме не.
Ѓозлеме е вид тенка пита која ја полнат со сирење, спанаќ или варен компир и многу зачини. Ние пробавме со компир и сирење. Секако, после ручекот добивме чај, а потоа погодете што? Сладолед!
Овој сладолед е насекаде, па дури и на свадбите. Можеби бевме помеѓу малкуте туристи кои го посетуваат Кахраманмараш, па на луѓето им беше интересно што дури бевме поканети на свадба.
Знам дека чекате да ви раскажам уште малку за сладоледот, ама морам да ви кажам дека кога влеговме на свадбата, сите беа весели и почнаа да танцуваат со нас.
Така, додека танцувавме, една тетка дојде да ми каже дека кумот не е женет (со мимики и гестови, но кога ми ја покажа неговата рака без прстен, тогаш разбрав што сака да каже).
На свадбата немаше многу гости, па беше лесно да се запознаеш со сите. Ресторанот беше мал, но и масите беа празни што за нас Македонците е нешто многу чудно.
Како така свадба без пирошки? Е, тука немаше пирошки, ниту пак салати, а не видов ни да служат вечера.
Единственото нешто што се служеше на оваа свадба беше многу сладолед и вода.
Ова е доказ дека овој сладолед е кралот на Кахраманмараш, па ако планирате да одите во Турција наскоро, не заборавајте да додадете на вашата листа турски сладолед!
А, што се случи со кумот? Танцувавме, ама не планирав да останам таму, па така кумот си отиде дома без жена, а јас? Јас си јадев сладолед.
M. Г. | Црнобело / фото: depositphotos.com
Би можело да ве интересира:
Препорачуваме
Најчитани неделава
