„Го најдов тајниот дневник на баба ми по нејзината смрт, ме расплакаа работите што ги напишала за мене“

„Од денес јас и ти имаме тајна. Сосема сама направи шест чекори. Не можеме да им го кажеме тоа на мама и тато. Тие мора да бидат први кои ќе те видат како одиш“, пишува во дневникот кој една баба го водела од раѓањето на нејзината внука.

Велат, љубовта на бабите кон внуците е поголема од онаа кон нивните деца. Доказ за тоа е и бабата на Натали Карло Мањо, која од моментот кога се родила нејзината внука, почнала да пишува дневник посветен на малото девојче и на сите убави работи кои ги доживеале заедно.

По смртта на својата баба, Натали го открила тајниот дневник, па неколку страници од него сподели на Инстаграм со своите пријатели и предизвика грст емоции кај сите што ги прочитаа овие искрени и среќни записи.

Таа пишува дека не можела да ги задржи солзите додека ги читала емотивните зборови на својата почината баба.

Што напишала бабата во тајниот дневник на нејзината внука?

„Натали денес полни една недела и сè е во ред“, стои во една од првите белешки во дневникот.

„Од денес јас и ти имаме тајна. Сосема сама направи шест чекори. Не можеме да им кажеме на мама и тато. Тие мора да бидат први кои ќе те видат како одиш. Ти си среќна, малечка - сите ја сакаат Натали“, пишува баба ѝ.

Брзо потоа таа открива дека тајната веќе не е тајна:

„Па сега, малечка моја, сите знаат. Мајка ти ми се јави да ни каже мене и на дедо ти дека си почнала да одиш“, напишала бабата.

„Често посакувам и мајка ми да можеше да те види барем еднаш. И таа ќе те сакаше до смрт, исто како сите ние“, стои во друг запис.

„Смешно е што, откако се роди, врз мене го имаш оној ‘ефект на среќна баба’. Едноставно, не можам да си го замислам животот без тебе“, пишува во дневникот.

Таа ѝ пишува и за нејзиниот прв роденден:

„Нема да се сеќаваш на овој роденден бидејќи си премала, но си помина навистина прекрасно и ги воодушеви сите кои те сакаат“.

„Денес дедо доби вистински бакнеж од неговата омилена внука. Денес многу го израдува (како што го радуваш секој ден)“, стои во дневникот.

Емотивните белешки на бабата наскоро станаа вирални и почнаа да се споделуваат на социјалните мрежи, како доказ на вистинската љубов меѓу бабата и внуката.

А. Ј. | Црнобело