Колку време треба да помине за повторно да останете бремени, после царски рез?

Според генералното правило, најдобро е да чекате 18 до 23 месеци после бременост за повторно да зачнете. Истиот период е препорачлив и за природното, и за породувањето со царски рез.

Иако можеби ви звучи како долг период, треба да земете предвид дека само што сте имале голема операција. На телото му е потребно време да закрепне и да си ги врати изгубените хранливи материи.

На пример, можно е после породувањето да бидете анемични бидејќи железото од вашата крв се пренесувало кај бебето во текот на бременоста. Покрај тоа, овде е и големото количество крв што се губи при самото породување. Важно е да знаете дека жените кои имале царски рез можат да изгубат дупло повеќе крв од оние кои имале природно породување.

Истовремено, некои истражувања покажале дека жените кои повторно остануваат бремени помалку од 6 месеци после последното породување имаат поголем ризик од компликации. Овде спаѓаат пукање на матката, па дури и предвреме родено бебе.

Покрај тоа, после породувањето ќе ви биде потребно време да се навикнете на родителскиот живот. Сигурно не сакате уште една одговорност пред добро да знаете што треба да правите. Кога ќе си дадете време да закрепнете и да го научите потребното, за следното дете ќе можете да се грижите многу подобро.

Доколку сте во доцните 30-ти, можете да пробате да зачнете уште 12 месеци после царскиот рез. Причината е што жените над 35 години почесто имаат проблеми со зачнување на второ дете. Покрај тоа, ризикот за отежнато зачнување се зголемува со возраста.

Сепак, секоја жена е различна и има различни потреби, па најдобро е да се консултирате со вашиот лекар.

Спирова С. | Црнобело