Во скопска населба налетав на мајка што избрка дете од лулашки, бидејќи нејзиното проодувало – стоп за „алфа мајки“

Сигурно секој од нас барем еднаш во животот се соочил со некоја Алфа мајка во населба, чие дете е најдобро, најубаво, најпаметно, најкултурно и сè нај нај нај, а другите деца не чинат.

За жал бев сведок на една ситуација во Скопје, која малку недостасуваше да прерасне во физичка пресметка.

На игралиште во нашата населба, мало дете (отприлика 6-7 години) вика по мајка му да дојде кај лулашките, зашто  било избркано од мајка на друго дете.

Мајката се појавува видно вознемирена и прашува која е таа жена што брка деца од лулашки.

Тогаш се исправи Алфа мајкава, со највулгарни зборови, објаснувајќи дека децата се бркале и нејзиното не можело да проодува, па уште и се силеше дека ќе ја кубе другата мајка.

Се појавија и други луѓе кои се обидоа да ја вразумат, дека не е во ред тоа што го прави, а воедно не ѝ било ни првпат. Речникот кој го употреби беше во најмала рака уличарски, гестикулациите неартикулирани, односот под секое ниво.

Гледам, фаќам сеир и се чудам.

Аман жено, проодуваш бебе на лулашки, со 30 деца околу и притоа ти пречат. Игралиштата се за децата, таму растат, таму се социјализираат.

Во модерново време кога родителите едвај успеваат да ги тргнат децата од телефони, компјутери и таблети, најголемо задоволство е да видите дека деца од сите возрасти играат друштвени игри на отворено.

Замислете мајка, која не поднесува деца, ако не се нејзините. Не ми се веруваше. Дури и односот кон сопругот ѝ беше со доза на надреденост. Кутар и тој, којзнае како му е дома.

Затоа, поздрав до сите Алфа мајки, манијаци за контрола - оставете ги и вашите и сите други деца да бидат деца, да растат безгрижно, да играат и да се дружат, правото на игра им е загарантирано како и секое друго основно право, не ги принудувајте да се плашат да излезат и да бидат свои.

Дома не ви дошле да ви прават хаос, надвор се, на игралиште кое е идеално за нив и апсолутно немате право да ги навредувате и бркате!

Содржината и ставовите изразени во авторските текстови и колумни претставуваат лични ставови на авторот и не мора нужно да ги одразуваат ставовите на редакцијата на порталот CRNOBELO.com

©CRNOBELO.com Забрането преземање и копирање. Крадењето на авторски текстови е казниво со закон.

  Кара | фото: freepik.com