Сања Савеска за стилот и убавината: „Никогаш не би облекла нешто ‘тигресто’, а на пат не тргам без удобни патики“

„Јас сум гурман, сакам да пробам од сè што ќе видам, но знам дека не смеам да претерам, па прекинувам кога ми е највкусно. Зависна сум од благо, па веќе неколку години сама си подготвувам торти и колачи кои содржат само природни засладувачи“ - вели водителката на „Брза кујна“, Сања Савеска.

Сања Савеска, водителката на „Брза кујна“, е една од миленичките на македонската публика.

Секогаш насмеана и позитивна, Сања шири убава енергија каде и да се појави.

Но, освен со својата насмевка и шарм, таа привлекува внимание и со стилот и негуваното лице.

Во разговор за CRNOBELO.com, Сања ни ги откри своите тајни на убавината, но и како ја одржува линијата и покрај сите обврски:

Стил на облекување

Она што ми е најважно во однос на стилот на облекување е да се чувствувам удобно, каде и да сум.

Удобноста не би ја жртвувала за ништо, бидејќи доколку не се чувствувам добро во она што го носам, целото внимание ќе ми биде насочено таму, и мислам дека не би можела да му посветам внимание на останатото.

Приватно, мој избор секогаш се спортски и едноставни, лежерни модни комбинации.

Имам безброј модели на фармерки и патики, кои сакам да ги комбинирам најразлично, во тој стил сум јас - Сања.

Сè останато е веројатно избор поради некоја работна задача или настан, каде треба да се испочитува дрес код.

Пазарам секаде каде што ќе видам нешто што ми се допаѓа, најчесто тука кај нас.

Не робувам на познати и скапи брендови, најважно ми е да се во прашање квалитетни и убави материјали.

Немам некое посебно парче без кое не одам на пат.

Единствено што секогаш мора да имам, тоа се квалитетни и удобни обувки, затоа што кога негде патувам сакам секое ќоше да го испитам, па сум постојано во движење.

Инаку, никогаш не би облекла тигрести парчиња гардероба или чевли, преевтино ми изгледа!

Нега на лице и тело

Кога станува збор за негата на лицето, морам да кажам дека порано не се оптоварував толку многу како што внимавам сега.

Но, имав среќа што многу малку или воопшто не користев шминка и не го „заморував“ лицето.

Професијата и времето поминато пред камери, од друга страна, пак, бараат постојано нанесување силна шминка, што придонесува за забрзано стареење на кожата, доколку соодветно не се негува.

Внимавам каква козметика и шминка користам, не дозволувам на моето лице пред спиење да остане грам шминка.

Користам масла за длабинско чистење и нега, нанесувам серуми и креми кои ми одговараат.

Пијам многу вода, нешто што порано ми беше проблем, но сега ја променив таа навика и некако кожата ми е благодарна.

Одвреме-навреме одам и на козметички третмани за хидратација, три месеци пијам колаген па три одмарам и така ја потхранувам редовно кожата.

Дома не експериментирам со третмани, ги имам козметичките салони во кои имам доверба и тие се тука секогаш да ми ги дадат најдобрите совети и услуги.

Продолжува на следната страница...