Најчести грешки кои несвесно ги правите при готвење

Сите имаме некоја финта со која постигнуваме подобар вкус на храната, поефикасно чистење на кујнските елементи или пак, прва помош при кулинарска незгода.

Сепак, колку и да не ви се чини дека е тоа така, некои од тие финти што се толку користени при нашите готвачки мајстории, всушност се сосема погрешни.

Тестенините треба да се варат во многу вода

Всушност, нема потреба од тоа, доволно е да бидат покриени 2-3 сантиметри. Во случај тестенината да упива премногу вода или пак пребрзо да испари, додавајте помали количини, но внимавајте додадената вода исто така да е топла, за да не го прекине процесот на варење.

Солта го забрзува вриењето

Кога правите некој специјалитет со тестенини или пак домашна супа, инстинктивно ви доаѓа да додадете сол во водата пред да зоврие, мислејќи дека ќе послужи како катализатор за побрзо вриење.

Најдобро е да додадете сол во првите моменти од зовривањето, па по една минута да ставите тоа што планирате да зготвите во зовриената вода.

Алкохолот целосно испарува во тек на готвењето

Дел од алкохолот испарува веднаш, но има дел што ќе остане дури и по час до два од додавањето во храната. Затоа, доколку готвите за деца, најдобро е да го прескокнете додавањето вино или пиво во специјалитетот.

Микробрановата печка е штетна

Поборниците за здрава исхрана цврсто стојат на ставот дека микробрановата е штетна за вашето здравје, но тоа не е во целост точно. Овој апарат ви овозможува термичка обработка за кратко време.

На пример, кога динстувате зеленчук во микробранова, задржувате повеќе хранливи материи, отколку кога тоа го правите класично, на рингла од шпорет.

Ако се изгорите, нанесете облога од мраз

Златно правило: Врз изгореница никогаш не ставајте мраз, туку држете го изгореното место под млаз ладна вода од чешма. Потоа, добро исушете и замотајте го местото со завој, за да се спречи оштетување на кожата.

Добра алтернатива е секогаш и бабиниот совет – изгореното место да го премачкате со масло за јадење. Понатаму интервенирајте со креми или гелови соодветни за ваква ситуација.

С. У. | Црнобело