Предмети од домот на кои не им обрнуваме внимание, а се вистинска оаза на бактерии

Кога чистиме дома, обрнуваме внимание на многу површини и агли, трудејќи се нашиот дом да биде беспрекорно чист.

Но, очекувано, на некои предмети забораваме, а всушност тие се реална закана по нашето здравје. Можеби и мислите дека некои предмети нема потреба редовно да се чистат, но од нив демнат зарази, бактерии, прашина и мувла.

Особено внимавајте на следниве предмети:

Завесата во бањата

Доколку имате мушаместа завеса над кадата или туш-кабината, треба редовно да ја перете во раствор со средство за дезинфекција и против мувла или пак со оцет и сода бикарбона.

Поради постојаната влага, на долниот дел лесно се создаваат мувли, кои испуштаат спори, кои пак, преку водата лесно се лепат за вашето тело, а можете и да ги вдишете.

Покрај на завесата, обрнете внимание и на силиконските фуги кои ја спојуваат кадата или туш-кабината со ѕидовите. И тие се идеално место за создавање мувла.

Далечински управувачи

Било да е од телевизорот или клима-уредот, далечинскиот управувач често го допираме со нечисти раце. За да ги дезинфицирате, доволно е да пребришете со влажно марамче или со памук натопен во алкохол.

Чантата која ја носите секој ден

Ја оставате насекаде, па дури и на под, ја допирате со валкани раце, ви ја придржуваат пријателките, ја закачувате на закачалката или кваката во јавните тоалети... Најмалку еднаш неделно испразнете ја, исфрлете ги непотребните сметки и пребришете со марамче за дезинфекција.

Четките за шминка

Најпаметно е еднаш неделно да ги исперете со благ шампон. На нив лесно се размножуваат бактерии, бидејќи шминката и остатоците од клетките од вашата кожа создаваат идеални услови за тоа.

Градник

Иако ви изгледа дека во најголем дел од времето е чист, всушност треба да го перете после три до четири дена постојано носење. За да ја зачувате еластичноста, перете го во специјална мрежичка за перење градници.

Тастатурата на компјутерот

Тастатурата е вистинска депонија на честички од изумрена кожа, остатоци од храна и прашина. Доволни се само медицински алкохол или влажни марамчиња за дезинфекција, за да можете да ја исчистите.

Еднаш неделно пребришете ги и екранот и маусот од компјутерот.

Прекинувачи за струја и кваки на вратите

Ова се делови од домот на кои лесно се заборава, а кои најчесто се идеални за врз нив да се нафати слој од нечистотија. Со оглед на тоа што често ги допирате со раце, а ретко ги миете рацете после тоа, еднаш неделно дезинфицирајте ги и овие површини.

Корпите за ѓубре

Било да е корпата во тоалетот или кујната, потрудете се барем еднаш до двапати месечно да ги дезинфицирате со соодветно средство за дезинфекција и со врела вода.

Можете дури и да прскате со алкохол по секое празнење на ѓубрето.

Е. Д. | Црнобело