Што да правите кога облеката ви мириса лошо дури и после перење?

Иако квалитетниот прашок и добриот омекнувач се важни за вашата облека да мириса убаво, одвреме-навреме треба да ја исчистите пералната од овие продукти.

Доколу сакате облека со свеж мирис, важно е да одберете квалитетен прашок и омекнувач што го задржува мирисот. Но што кога вашата облека мириса непријатно, дури и после перењето? Во тој случај можеби е време да размислите за вашите грешки, но и да ја исчистите пералната.

Имено, доколку ја исперете облеката навечер, а ја закачите дури следното утро, свежината од детергентите ќе „исчезне“. Доколку немате избор и морате да перете на овој начин, оставете ја барем вратата од пералната отворена. На овој начин вишокот влага ќе испари и нема да предизвика непријатен мирис.

Исто важно е и чистењето на пералната – потребно е темелно да ја исчистите барем 2-3 пати годишно. За ова можете да употребите обичен оцет.

Измешајте две шолји оцет со две шолји вода. Во смесата натопете крпа и со неа исчистете ја внатрешноста на пералната. Добро исчистете ја и вратата и сите места каде што може да се задржи дел од прашокот или омекнувачот.

Потоа измешајте 1/4 шолја сода бикарбона со исто количество вода. Ставете ја смесата во садот за детергент на пералната и пуштете ја да испери на висока температура.

Кога ќе заврши циклусот на перење, исплакнете го садот за детергент со топла вода. Потоа во него ставете половина шолја оцет и повторно пуштете ја пералната.

За да ја задржите чистотата на пералната што е можно подолго, бришете ја нејзината внатрешност со сува крпа после секое перење. Исто така оставајте ја вратата од пералната отворена за да може добро да се исуши.

Спирова С. | Црнобело