Направете сами: Eколошко универзално средство за чистење на домот

Многумина се сомневаат во ефикасноста на домашно направените средства за хигиена. Сепак, не само што е возможно сами да направите темелен чистач за вашиот дом, туку тоа може да го сторите на економичен, еколошки и забавен начин.

Со ова универзално средство може да чистите различни површини во домот, а неговата подготовка нема да ви одземе повеќе од 5 минути.

Важно е да се напомене дека во случај на употреба врз дрвени површини, препорачливо е да се користи исклучиво за лакирано дрво.

Состојки:

•  1/2 шолја бел оцет со 9% алкохол
• 1 лажица боракс
• 1 лажица хидроген 3%
• 2 чаши топла вода
• исцеден сок од 1 лимон
• гранче рузмарин (по избор)
• есенцијално масло (по избор)

Подготовка:

Во длабок сад се става 1 лажица боракс, се полева со двете чаши топла вода и се меша додека да се раствори. Потоа, се додаваат хидрогенот, оцетот и сокот од лимон, повторно се меша, а на крај се додава есенцијалното масло.

Целата смеса се претура во шише со прскалка, во кое може претходно да ставите гранче рузмарин и средството е подготвено за употреба.

 За состојките:

• Боракс е природен минерал, во форма на прашок кој можете да го најдете во аптеките, по цена од околу 40 денари. Тој дејствува како дезинфекциско средство и отстранува маснотии.
• Хидрогенот исто така може да се најде во аптека, по цена од околу 30 денари. Не се препорачува да се користи хидроген со повеќе од 3%. Тој е силно антибактериско средство, убива салмонела, дезинфицира и остава сјај на површините.
• Оцетот и лимонот поради големото ниво на киселост веднаш ги убиваат бактериите.
• Есенцијалните масла се концентрати од различни растенија кои имаат антибактериско дејство и испуштаат пријатна миризба.

А.Т. | Црнобело