На гости кај Емран: „Погледот од мојата тераса во Ростуше е спектакуларен, а Дуфскиот Водопад ми е на 1 километар“

Детали

четврток, 18 ноември 2021

Семејната куќа на Емран Сејдиу (25) е на само еден километар од Дуфскиот Водопад, а погледот од неговата тераса е директно кон планината Бистра. Тој за CRNOBELO.com споделува зошто го обожава својот роден крај…

Семејната куќа на Емран Сејдиу (25) е на само еден километар од Дуфскиот Водопад, а погледот од неговата тераса е директно кон планината Бистра.

Емран Сејдиу е роден во Гостивар и до 18 години живеел и учел основно и средно училиште во Ростуше.

По завршување на средно се запишал на студии во Скопје на Балканскиот Универзитет на економски науки, каде што дипломирал и сега работи во компанија за транспорт и логистика.

Но, иако живее во Скопје вели дека најголемо задоволство му се миговите минати во релаксација во Ростуше.

За CRNOBELO.com Емран открива зошто го обожава Ростуше:

„Викаат кај и да оди човек, што и да прави сепак дома си е дома, па така и јас се трудам барем 2 пати месечно да си одам дома во Ростуше, да одморам, прошетам, да ги посетам моите коишто уште активно живеат и работат во Ростуше и секако да ги посетам преубавите места по кои ова село е познато.

Омилен ми е спектакуларниот поглед од мојата тераса, а го обожавам и познатиот Дуфски Водопад, кој е на само еден километар од мојот дом.

Најмногу што ме опушта е погледот од мојата тераса кон планината Бистра која целосно се гледа и е преубава во сите годишни времиња, а особено во пролет кога сè е зелено. Тука секое утро со задоволство пијам кафе и појадувам.

Инаку, Ростуше е село во Западна Македонија, сместено во Долна Река, после Маврово за патот кон Дебар.

Нашиот крај може да се пофали со многу работи, дел од нив се како што споменав Дуфскиот Водопад, кој топло го препорачувам особено летно време за разладување. Во тој период го посетуваат навистина многу луѓе.

Исто така, морам да напоменам дека блиску е и Манастирот Свети Јован Бигорски, кој е буквално еден од најпознатите манастири во Балканот и Европа и е еден од најстарите и е на само 2 километри од селото Ростуше.

Продолжува на следната страна...