„Запознав психопати кои пробаа да ме скршат“ - Нина Бадриќ искрена, откако маж ја демнеше 2 години

Детали

петок, 26 април 2024

„Ме уценувале, сум доживувала неправди и обиди за застрашување од моќни мажи. Сум запознала и психопати, во вистинска смисла на зборот, кои пробале да ме злоставуваат психички. Сите тие пробувале да ја покажат својата сила над мене. Не сакам многу да се сеќавам на тие тешки ситуации“, вели хрватската пејачка.

Хрватската ѕвезда Нина Бадриќ (51) се приклучи на кампањата на здружението Женска соба, чија цел е да им се даде поддршка на жените кои биле жртви на сексуално вознемирување и насилство.

Во интервју за магазинот Story.hr, таа искрено зборува за многу предизвици со кои се соочила низ годините, но и за мажите кои ги запознала, а за коишто вели дека пробале да ја скршат.

Сето ова доаѓа неколку години откако Бадриќ се соочи со демнач, маж кој ја следел насекаде, па дури и поставил и уред за следење на автомобилот, а одел и на летување каде што одела таа.

Поради сето ова, пејачката долго живеела во страв.

„Ќе кажам дека Бог ме чува сите овие години, а некои многу опасни ситуации во кои сум се нашла, сепак завршиле добро.

Многупати ме уценувале, сум доживувала неправди и обиди за застрашување од моќни мажи.

Во животот, за жал, сум запознала и психопати, во вистинска смисла на зборот, кои пробале да ме злоставуваат психички или емоционално.

Всушност, поточно е да кажам дека пробувале да ме скршат. Сите тие биле мажи кои пробувале да ја покажат својата сила над мене во одреден момент. Не сакам многу да се сеќавам на тие тешки ситуации.

И се чудам на својата храброст и пркос, зашто сега не знам дали би имала храброст да реагирам како во минатото“, вели Бадриќ во интервјуто.

Пејачката својата поддршка за жените кои минале низ голгота ја даде и преку својот Инстаграм профил.

„Денес е Меѓународен ден за борба против обвинувањата на жртвите на сексуално насилство, чија цел е да ги охрабри да му кажат ‘не’ на насилството.

Важно е општеството да има нулта толеранција кон сексуалното злоставување и сите форми на сексуално вознемирување“, напиша таа.

Прочитајте и Нина Бадриќ за човекот кој ја демнел 2 години – „Летуваше каде што јас бев на одмор, ми постави уред за следење на автомобилот“

А. Ј. | Црнобело