На гости кај Јулинда и Рилинд: Стилски стан во Скопје со кујна со отворени полици (фото)

Нашата кујна е спој на природните суптилни бои и топли тонови, во комбинација со црниот метал, како посебен акцент на целиот дизајн.

Островот е централниот момент на нашата кујна и иако просторот не ни дозволуваше за поголеми димензии на овој елемент, сепак си направивме доволно простор за нашето утринско кафе да го испиеме во овој дел од станот, и потоа секој да си продолжи со своите дневни обврски.  

Како голем љубител на кафе во нашата кујна мораше да постои отворен „Coffee Corner“ со различни видови на кафе, и секако разни сетови на шолји.

Во овој празничен период китењето на елката е ритуал кој за мене е многу драг и битен, а оваа година ни донесе многу емоции и смеа зошто имавме помош од нашиот син Крон, кој со многу возбуда и радост ги местеше сите украси на нашата елка.

Елката ја сместивме во аголот од дневната соба.

Детската соба според мене претставува преплет на убав хаос, најубави моменти и искрени емоции.

Елементите се наместени врз една чиста бела основа. Мебелот е во бела боја, а ентериерот е исполнет со разни играчки и едукативни елементи кои се лесно достапни за деца.

Многу време си поминуваме во оваа соба каде што имаме можност и задоволство да ги видиме нашите деца како растат и заедно со нив креираме убави семејни спомени.

Спалната соба мораше да биде спој на максимална функционалност и удобност.

Од големиот плакар за задоволување на нашите потреби за складирање, до голем удобен кревет за спиење и тоалет кој е дел од спалната соба.

Користени се светлите тонови на бои кои се во корелација со другиот дел на станот, во комбинација со дрвото, исто така материјал кој се повторува низ сите простории и асоцира на топлина.“

©CRNOBELO.com Забрането преземање и копирање. Крадењето на авторски текстови е казниво со закон.

Симона Симионова | Црнобело