Кулинарски грешки поради кои не ви успеваат ни едноставните рецепти

Користите иста шпатула за сите јадења

Кога готвите, секогаш е важна и шпатула што ја користите.

Ако, на пример, пржите јајца, потребна ви е тенка и широка шпатула со која полесно ќе ги превртите.

Силиконските шпатули, пак, се најдобри за мешање меки и влажни состојки, како тесто или густ сос.

Не треба да користите дрвени шпатули за месо бидејќи во нив можат да се соберат бактерии.

Не внимавате на редоследот на свежите и сувите зачини

Навистина е важно кога ги додавате сувите, а кога свежите зачини.

Сувите зачини е препорачливо да се додаваат на почетокот од готвењето. На овој начин ќе имаат можност да омекнат и да го ослободат мирисот.

Свежите зачини се додаваат при крајот или на веќе зготвено јадење.

Не го рендате путерот пред да го додадете во тесто

Кога правите тесто со путер, многу полесно ќе го измесите ако го изрендате путерот, наместо само да го исечете.

Секако, ќе го извалкате рендето, но лесно ќе го измиете со топла вода.

Многу го гмечите меленото месо

Кога го мешате меленото месо со зачини, немојте многу да го гмечите, ниту да го месите предолго.

Причината е тоа што откако ќе го испечете или испржите, месото ќе биде посуво.

Исто така, кога правите ќофтиња, немојте многу да ги гмечите со рака и подобро формирајте ги со лажица.

Не го миете оризот пред готвење

Навистина е важно темелно да го измиете оризот за да го отстраните скробот од него. Во спротивно, при готвењето зрната ориз ќе се залепат едни за други.

За најефикасно да го измиете оризот, ставете го во длабок сад (може и тенџере) и наполнете го со вода.

Со раката промешајте го додека водата не стане бела, па истурете ја.

Повторувајте додека водата не е чиста откако ќе го промешате оризот.

Спирова С. | Црнобело