7-дневен план со кој ќе ги промените лошите навики за јадење (без да гладувате)

На првиот ден исфрлете ги намирниците со рафиниран шеќер и вештачки засладувачи, на вториот почнете да пиете по 1,8 литри вода, а на третиот воведете пробиотици во исхраната.

За многу луѓе е предизвик да се хранат здраво, а кога сакаат да направи промена, некогаш одат до екстреми.

Но, ако очекувате преку ноќ да ги промените лошите навики, голема е веројатноста брзо да изгубите волја.

За таа цел, д-р Кетрин Сандра Фримен, која е гастроентеролог, направила 7-дневен план кој ќе ви помогне постепено да ги воведете позитивните промени.

Притоа, таа истакнува дека нема потреба од гладување или откажување од одредени групи храна.

Целта на нејзиниот план е промените да се воведат постепено, а со тоа да се подобри и состојбата на дигестивниот систем.

Ова, пак, носи придобивки за целокупното здравје.

„Сакам да нагласам дека ова не е постење или детокс со сокови или нешто слично. Целта на овој план е да ја избирате правилната храна за вас која ќе биде антивоспалителна и ќе ја поттикне дигестијата“, открива таа за The Post.

Седумдневниот план на д-р Фримен:

Прв ден

Пред да почните со какви било промени во исхраната, докторката препорачува да се консултирате со вашиот лекар или нутриционист.

Во првиот ден треба само добро да размислите за вашиот начин на исхрана и кои промени треба да ги воведите.

Овој ден од исхраната исфрлете ги намирниците со рафинирани шеќери и вештачки засладувачи. Исто така, избегнувајте преработена храна и црвено месо.

Според докторката, ова се намирници кои ги поттикнуваат воспалителните процеси во телото, го оптоваруваат имунитетот, а имаат влијание и на нивото на стрес.

„Знаеме дека некои од намирниците во оваа група можат да го зголемат ризикот од рак на дебелото црево. Наместо тоа, наполнете ја чинијата со пилешко, зеленчук приготвен на пареа и многу вода.

Фокусирајте се на храна од цело зрно, едноставни намирници, зеленчук богат со хранливи влакна. Користете зачини како ѓумбир, куркума, па и нане кои се добри за стомакот“.

Втор ден

Вториот ден треба да се фокусирате на пиењето вода. Потрудете се да испиете барем 1,8 литри вода.

Добро би било да почнете да пиете и чаеви. Зелениот чај, на пример, има антивоспалителни својства, а може да го намали и лошиот холестерол.

Трет и четврти ден

Во третиот и четвртиот ден треба да се фокусирате на консумирање пребиотици и пробиотици кои се добри за дигестивниот систем.

Пијте јогурт и јадете ферментиран зеленчук, како зелка, кисели краставички и слично.

„Некои пробиотици и пребиотици можат да ги намалат воспаленијата во дигестивниот систем“, вели докторката.

Петти ден

Главниот фокус на петтиот ден треба да ви бидат хранливите влакна.

„Кога велам хранливи влакна, мислам на храна како овес, зрнести плодови, кафеав ориз, интегрален леб, чиа семе, леќа, зелен лиснат зеленчук“, вели докторката.

Хранливите влакна даваат енергија за поголема физичка активност, па на петтиот ден воведете го и ова.

Треба да вежбате 30-тина минути на ден, да пешачите или да возите велосипед.

„Физичката активност, во комбинација со пиењето вода, како и хранливите влакна, ќе ви помогне поредовно да одите во тоалет и да се чувствувате подобро“.

Шести ден

При крајот на неделата потрудете се да ги воведете сите здрави навики од претходните денови.

Исто така, вечерајте порано, намалете со алкохол и спијте доволно.

За да го намалите стресот, исклучете ги електронските уреди навечер и поминете време со блиските.

Седми ден

Ако сте го следеле планот, на крајот од неделата би требало да се чувствувате подобро, да имате помалку надуеност, да спиете подобро и помалку желба за нездрава храна.

Сега, на седмиот ден, фокусирајте се на тоа да направите план што вам ќе ви одговара, а кој ќе трае подолго од седум недели.

„На седмиот ден прашајте се како да ги задржите овие навики во текот на целата година“.

Докторката препорачува и да се консултирате со лекар во случај да имате заболувања на кои треба да се обрне повеќе внимание.

Спирова С. | Црнобело