Родители, бирајте ги внимателно здравите намирници за вашите деца

Младите родители, особено оние кои првпат имаат дете, прават сè што е во нивна моќ за малиот член на семејството да биде здрав, што понекогаш едноставно, ги преминуваат разумните граници.

Постојат родители кои опсесивно им даваат на децата сирупи и додатоци во исхраната за имунитет и ги „налеваат“ со цедени сокови.

Сепак, физиологијата на малото детско тело е поразлична од онаа на возрасен човек, па затоа се случуваат грешки, кои во најмала рака, можат да им наштетат на децата:

Цеден сок

Иако е многу популарен начин на исхрана, со цедените сокови и смутијата добивате вкусна течност со мала количина хранливи состојки, бидејќи сите значајни растителни влакна и цврстата материја ја исфрлате заедно со пулпата која останува во контејнерот од соковникот. Наместо сок, дајте им да изедат парче свежо овошје.

Јогурт

Избирате нискомаслен јогурт збогатен со пробиотик и витамини? Од тоа воопшто нема потреба, бидејќи вистинскиот јогурт сам по себе е пробиотик. Заборавете на сите тие специјални јогурти и купувајте најобичен, полномасен јогурт. Избегнувајте ги засладените и овошни десерти врз основа на јогурт, бидејќи во нив нема ништо здраво.

Житарици

Житните снегулки и муслите изгледаат како здрав избор за оброк, но она што е наведено со ситни букви на задната страна на пакувањето, е дека при нивното производство се користат подобрувачи на вкус, шеќери и засладувачи. Подобро е да купувате житарици во цело зрно и да ги варите пред да ги додадете во јогурт или со нив да подготвите овошни каши.

Мед

Децата помлади од две години воопшто не треба да консумираат мед, колку и да ви е познато и сигурно неговото потекло. Освен што е алерген, медот содржи и состојки кои дигестивниот систем на детето не може да ги процесира.

Грозје

Исто како и за медот, почекајте вашето дете да биде постаро од две години за да можете безгрижно да му давате грозје. Помалите деца немаат развиени рефлекси, а зрната грозје се лизгави и лесно може да ги проголтаат цели зрна или пак да им застанат во грлото.

Мултивитамини и суплементи

Доколку за тоа нема реална потреба и доколку не препорача лекар, немојте на своја рака да давате додатоци во исхраната.

Милкшејк

Иако е поздрава верзија од газираниот сок, за најмалите најдобар избор за пиење се само водата и незасладените чаеви.

Е. Д. | Црнобело