„Руска“, сутлијач, пача – 7 јадења од кујната на словенските народи кои се најдобри кога се јадат ладни

Ние, словенските народи, сме добро познати по нашата вкусна кујна. Ниту еден скап ресторан не може да го надмине домашно зготвеното јадење на нашите баби и мајки. 

Но, има исклучоци од секое правило, дури и кога станува збор за нашата храна.

Некои јадења се едноставно повкусни кога се ладни:

Таратор

Многумина од странците знаат да го помешаат со грчкото ѕаѕики, но тараторот е всушност ладна супа. Се прави од кисело млеко разредено со малку вода, краставица, масло, сол, копар и толчен или сечкан лук.

Има повеќе верзии на таратор низ Балканот, па така некаде се додаваат ореви, диво нане, моркови, магдонос и останати додатоци. Најчесто се служи како предјадење.

Окрошка

Руската супа окрошка е уште едно традиционално словенско јадење кое е највкусно кога е ладно. Традиционално се подготвува со квас, но има и верзии кои може да се базираат на кисело млеко или кисела павлака и во нив нема квас. Во зависност од регионот каде се подготвува, окрошката може да има различни состојки.

Некои сметаат дека најдобра е вегетаријанската верзија со компири и краставици, кромид и ротквици. Други пак сакаат да додадат јајца и некое месо како колбас, телешко, говедско итн.

Како и да одберете, највкусно е кога се јаде на топол ден.

Сланина

Ова е парче отстоено, мрсно, свинско месо. Може да се јаде преку целата година, а може да биде и димено, зачинето со рузмарин и кориjандер.

Сутлијач

Оваа варијанта на млеко и ориз може да се најде во многу словенски земји, а не секогаш е десерт, туку може да биде и главно јадење за вечера.

Рецептот е едноставен, се користи млеко и се вари заедно со оризот додека не добиете густа структура на пудинг.

Можете да го зачините одозгора со цимет, ореви, кафеав шеќер, шафран, морско оревче, кокосово млеко, ванила или суво овошје како урми или суво грозје. Најважно е да се јаде ладен, иако многумина практикуваат да го јадат додека е топол.

Руска салата

Иако оригиналното име на оваа салата е Оливие салата, руската салата малку се разликува од неа и се проширила во времето на Советскиот Сојуз, кога имало насекаде достапни состојки за неа: варени компири, грашок, моркови, кисели краставички и шунка, а целото тоа замешано со мајонез. Некои верзии на оваа салата имаат пилешко, говедско месо или јајца.

Ајвар и лутеница

Најпопуларни во Македонија, Србија, и останатите земји на Балканот, ајварот е густ намаз добиен од црвени пиперки кои биле печени, пржени и зачинети, а многумина додаваат и модар домат. Лутеницата е пак базирана на мешавина од пиперки и домати. Двата намази се многу популарни и секогаш се служат ладни, а одат со скоро сите јадења.

Пача

Последна на списокот, но не и заборавена. Пачата или ја обожавате или ја мразите. Тоа е всушност желатин добиен од животински лој, којшто откако е зготвен како супа е оставен да се излади и природно да се желатинизира. Најчесто се прави од свинско, а може да се додадат и јајца или некои видови на зеленчук. На пачата никогаш не се додава вештачки желатин.

(О)Милена | Црнобело / Извор