9 традиционални вкусни сендвичи од целиот свет кои ќе ви го отворат апетитот

Типичниот сендвич секогаш вклучува леб, некаков вид на месо, зеленчук и сос. Сепак, варијациите низ светот се многубројни, а дел од нив се толку вкусни што веднаш ќе ви го отворат апетитот.

Десеттото место на списокот намерно го оставивме празно. Македонија има долга и богата гастрономска историја, но се чини дека немаме традиционален сендвич со македонски потпис.

Дали можеби лепчето исполнето со ајвар и сирење може да се смета за „македонски“ сендвич? Или пак, оној од времињата, лепче полнето со пржени компирчиња, салата, кечап и мајонез?

Пратете ни ги вашите предлози, а дотогаш уживајте во следните 9 сендвич-вкусови ширум светот:

Katsu Sando – Јапонија

Сендвич од мек, бел леб со сочно, похувано свинско месо со додатоци. Дел од Кацу Сандо сендвичите може да имаат и пилешко во составот, јајца или квалитетен Коби телешки бифтек.

Fischbrötchen – Германија

Свежо лепче и уште посвежа риба во комбинација со салата. Најчесто се прави со харинга, скуша, лосос или ракчиња.

Trapizzino – Италија

Овој сендвич е измислен пред само 10 години, но е многу популарен. Станува збор за триаголно пица лепче (тестото е идентично како она за пица) исполнето со различни месни додатоци – од свинско, до пилешко и ќофтиња.

Francesinha – Португалија

Со потекло од Порто, овој сендвич е направен со леб, шунка, свински колбас, бифтек или печено месо, стопено сирење и зачинет сос од домати и пиво. Најчесто се служи со пржени компирчиња.

Bocadillo – Шпанија

Овие сендвичи во шпански стил се сметаат за прилично скромна храна послужена во багет лепче. Се полнат со сè што е достапно, од омлети до сувомеснато или похувани мезиња.

Croque Monsieur – Франција

Топол сендвич направен со шунка и кашкавал, кој потсетува на тост. Јадењето потекнува од француските кафулиња и барови како брза закуска.

Doner Kebab – Турција

Познатиот турски донер, сервиран во специјално пита-лепче, со тенко исечкани парчиња говедско месо, сервирано со многу додатоци од типот на преливи и свежи салати.

Pulled Pork – САД

„Цепкано“ свинско или „на конци“ е сендвич типичен за САД, кој е достапен и кај нас, а лесно може да го направите и во домашни услови. Тајната е во сочното свинско месо кое „се распаѓа“ поради долгото, бавно печење.

Pølse – Норвешка

Нетипичен хот-дог сервиран на скандинавски начин. Дел од локалите ги варат виршлите во булјон за поинтензивен вкус и ги служат со различни додатоци и зачини.

(О)Милена | Црнобело