7 начини како да го користите сенфот во кујната - им дава шмек на салатите, го омекнува месото

Сенфот е зачин кој или ви се допаѓа или не го сакате. Професионалните готвачи, пак, го користат често и тврдат дека тој му дава сосема поинаков вкус на јадењето, особено на салатите или кога маринирате месо.

Па освен што можете да го споите со мед и да добиете прелив за пилешки прсти, или да го додадете во руска или пилешка салата, постојат уште седум начини на кои можете да го вклучите сенфот во вашата секојдневна исхрана и да ѝ дадете поинаков шмек на храната.

Погледнете неколку идеи во продолжение:

Печено месо

За да добиете убава кора од јагнешкото месо, на свинското филе или на мисиркините гради, премачкајте ги со сенф пред да ги ставите да се печат.

Риба

Рибите како лососот и туната се уште повкусни ако кората им ја премачкате со сенф и ги оставите да отстојат. Истото важи и за филетите, но нив е доволно да ги премачкате пред печење.

Тестенини

Неколку лажици зрнест сенф ќе им дадат убава свежина и арома на сосовите што ги подготвувате дома, а се на база на неутрална павлака или бешамел сос.

Пире од компири

Пробајте нешто поинакво и во класичното пире од компири додадете малку сенф за подобар вкус. Ова пире можете да го посипете и со крцкава сланина и веднаш ќе добиете одличен специјалитет.

Прелив за салата

Преливот со сенф е класичен додаток за салати од зелка, цвекло, мимоза салата и компир. Измешајте го сенфот со малку масло, бибер и сол и прелијте ја салатата што сте ја подготвиле.

Намаз

Направете вкусен домашен намаз - измешајте сенф со полурастопен путер и ќе добиете вкусен намаз за тост, сендвичи или додаток за печен зеленчук.

Јајца

Сенфот оди одлично во полнети јајца. Сварете ги јајцата, пресечете ги на пола, па извадете ја жолчката. Испасирајте ја и во смесата додајте сенф, малку путер, сол, бибер и копар. Наполнете ги половинките од јајцата со филот.

А. Ј. | Црнобело