Загорка и Мартин - семејство од Скопје кое секоја година со децата кампува во Грција: „Камперскиот живот е рај за нас“

Пред да ги добиеме нашите деца, јас и Мартин со нашите пријатели го искачивме Олимп (врвот Митикас), а интересно беше тоа што тргнавме во летна облека, не очекувајќи дека температурите горе се пониски од 10 Целзиусови степени, има силен ветар и воопшто не е наивно да тргнете неспремни во ваква авантура.

Се измрзнавме, се сретнавме со непознати инсекти и други предизвици, но за среќа сè се заврши добро и на крајот ни остана искуство вредно за паметење.

Околу камповите не можам да кажам дека сме наишле на опасности од инсекти, освен комарци на кои сме навикнати, па заштитните средства ни се дел од секојдневната рутина.

Можам да се сетам на една случка кога нашата Кира згазна пчела на плажа, па се исплашивме бидејќи не знаевме дали е алергична, но за среќа со нас секогаш носиме куп лекови за прва помош, во близина има дежурни аптеки, а секако и доктори, како во нашето семејство, така и во кампот, така што секогаш заеднички се справуваме со ваквите предизвици.

Да бидам искрена, поради интензивните дружења со другите деца честопати и нашите деца се разболуваат, но поради морето и воздухот овде секогаш ни минува полесно и побрзо, отколку во Скопје.

Камперскиот живот е доста динамичен, како што кажав потребна е добра организација и поделба на обврските, понекогаш знае да биде и напорен, посебно доколку имате мали деца, но забавата и авантурите кои децата ги доживуваат овде се незаменливи и сигурна сум дека спомените и другарствата кои токму овде ги создаваат ќе им траат цел живот“. 

Повеќе фотографии на следната страница...