Наталија (36) од Русија вторпат ја посети Македонија: „Омилена земја ми е, преку песните на Тоше дознав за неа“

Детали

вторник, 28 април 2026

„Немам македонски корени (барем колку што знам), но со целото срце ја сакам Македонија. Делче од вашата земја секогаш е со мене, и во мојата плејлиста“, вели за CRNOBELO.com Русинката Наталија, која неодамна помина 3.500km за да дојде од Улјановск до Скопје.

Наталија Калјакина (36) живее во градот Улјановск, кој се наоѓа на околу 900km источно од Москва.

Taa e фотограф и сопственик на фотостудио (Фотостудио Терраса) во градот каде што живее.

Таа неодамна ја посети Македонија, вторпат во живото, и тоа за да дојде на концертот на Лозано, чии песни ги обожава.

Но, со доаѓањето во земјава, Наталија си исполни уште една голема желба - да го посети Крушево и гробот на Тоше, зашто токму преку неговата музика дознала за Македонија.

А во неколкуте недели што ги помина кај нас, таа ги посети и Охрид, Бигорскиот манастир, уживаше во убавините на Скопје и околината.

За нејзиното патување и впечатоците од Македонија, Наталија раскажа во разговорот за CRNOBELO.com:

„За Македонија дознав благодарение на песните од Тоше Проески. Го следев неговото творештво и го читав секое негово интервју.

Во секое интервју тој зборуваше за својата љубов кон Македонија. Затоа многу ме заинтересира да ја посетам оваа земја.

Првпат бев во Македонија во 2012 година и оттогаш сонував повторно да се вратам, но околностите не ми дозволуваа.

Оваа година, конечно, успеав да го остварам мојот сон. И дури два!

Да се вратам во мојата омилена земја и да присуствувам на концерт на мојот омилен пејач, Влатко Лозаноски.

Патувањето во Македонија го планирав уште во август минатата година.

Купив авионски билети Казан - Белград за 8 март 2026 година. Во ноември 2025 година Лозано го најави својот концерт на 7 март во Скопје и јас, без двоумење, го променив мојот авионски билет за 6 март.

Ми беа потребни 24 часа за да стигнам до Скопје од Русија.

Излегов од дома на 5 март во 18:00 часот и пристигнав во Скопје на 6 март во 15:00 часот (+3 часа според улјановско време).

Три часа траеше патувањето со автомобил од Улјановск до Казан, каде што се наоѓа меѓународниот аеродром.

Четири часа траеше летот Казан - Белград. Авионот слета во Белград на 6 март во 5:25 наутро, а во 7:05 веќе седев во автобус кој патува до Скопје.

Самото патување помина лесно и без никакви проблеми, освен недостатокот на сон.

Продолжува на следната страница...