Македонците Митре и Катерина имаат пекарница во Сингапур: „Само 1% од гостите се Балканци, освен печиво служиме и ајвар и лутеница“

Кои производи се најбарани во вашата пекарница? Што е она по што сте препознатливи?

Ние имаме одличен избор на пекарски работи правени по домашни рецепти, имаме домашни благи работи, правиме свој јогурт, имаме одлично кафе и пијалоци, имаме ајвар, лутеница итн.

Препознатливи сме по уникатните производи и уникатниот имиџ „Yugoslavia“.

Најмногу коментирани се бурек, баклава, јогурт, погача…

Дали често имате гости од Балканот и како реагираат кога ќе видат дека дури во Сингапур може да ја најдат храната на која се навикнати дома?

По некој гостин од Балканот имаме скоро секојдневно (некои кои живеат тука или туристи во поминување), но се помалку од 1% од вкупниот број на гости.

Реагираат со неверување, коментари дека имаме фантастични производи кои се исти или подобри оттаму, ова има ист вкус како од баба ми (никој не рекол до сега како на мајка ми, ха, ха, ха), некои евоцираат спомени на минатото и секако сите се сликаат.

Колку на локалците им се допаѓаат балканските печива?

Локалците гледаат љубопитно, но, штом пробаат стануваат редовни муштерии, носат пријатели кај нас или им носат наши производи да се пофалат што откриле.

Сингапурците се опседнати со храна и никој не готви дома. Сингапур е во топ три градови во светот по најголем избор на храна - избран е за „Food capital of the world, drawing tourists and locals alike“.

Има најголем избор во светот на храна на Food Courts кои се заштитени од УНЕСКО, а исто така секогаш е во врвот на градови со најексклузивни (најдобри) ресторани во светот.

Дали постојат некои производи што муштериите ги бараат, но не сте во можност да ги произведете, зошто?

Локалците не знаат што би барале, но ние произведуваме 15 - 20% од она што знаеме.

Во преговори сме за отворање на трет локал и централна кујна со што ќе го поедноставиме и убрзаме производството и ќе воведеме нови производи.

Кога ви почнува работниот ден, во колку часот започнувате со производство?

Имаме околу 15 вработени и отворени сме секој ден од 9-21 часот.

Нас може цел ден да ни биде слободен, а може и да работиме 15 часа. Викендот ни е предвиден за време со семејството доколку Митре е во Сингапур.

Митре лета по цел свет и ги врши административните работи каде и да е, а во Сингапур помага што треба додека јас сум секојдневно присутна и ги вршам сите набавки, надзор на вработени, воведување на нови производи итн.

Постои ли нешто што ви недостига од Македонија и дали некогаш сте помислиле да се вратите назад?

Од Македонија ни недостигаат фамилиите (доаѓаме 1-2 пати годишно), а не сме ни помислиле да се вратиме во Македонија да живееме.

Прочитајте и Стојана Поповска живее во Сингапур: „Забрането е да се џвакаат мастики, си купувам бурек од пекарница на Македонец“

©CRNOBELO.com Забрането преземање и копирање. Крадењето на авторски текстови е казниво со закон.

 Б. С. Б. | Црнобело