Рената - наша инспиративна урбана дама на која велосипедот ѝ е заштитен знак (фото)

Детали

недела, 16 април 2023

„Возам велосипед и на 40 степени во лето и на 3 степени зиме. Толку многу ме поврзуваат со тоа што понекогаш кога поминувам некој ќе ja потпевне песната: „Девојката со точакот“. И велосипедот не ме спречува да ги носам своите најубави фустани и високи црвени потпетици“, вели инспиративната Рената Трајчевска (50) за CRNOBELO.com.

Рената Трајчевска (50) по професија филолог по македонски јазик и јужнословенски јазици и италијанист, сопруга и мајка на два сина е вистинска инспиративна урбана дама, која речиси 365 дена во годината може да ја видите на велосипед.

Таа слуша италијанска музика и вели дека сака нејзиниот живот да наликува на италијанска бајка.

Главното мото ѝ е секој ден задолжително барем малку да повози велосипед, а велосипедот како превозно средство не ја спречува да ги носи своите најубави фустани и препознатливи црвени високи потпетици.

За љубовта кон велосипедот, Рената говори за CRNOBELO.com:

„Пред повеќе од 40 години сестра ми ме научи да управувам со велосипед. Поточно бев второ одделение, а локацијата беше блискиот паркинг во центарот на Скопје, каде што живеевме.

Бев пресреќна и оттогаш следуваа многу рани од паѓања по колената и лактите, но тоа не ме поколеба да научам добро да се снаоѓам на велосипедот.

Првиот велосипед што сама си го купив беше „маунтин бајк“ во далечната 1991, кога се вратив од студискиот престој во Италија. Всушност од заштедените непотрошени пари јас си инвестирав во мојот прв велосипед.

Најчесто го возев на кратки релации низ градот, претежно од дома до факултет, а со оглед на фактот што живеев во строг центар, тоа и не беше некоја долга релација.

Кога се запознав со мојот сопруг, релацијата за возење ми стана малку подолга и така велосипедот ми служеше како превозно средство за одење кај него и назад дома.

Тогаш немаше многу сообраќаен метеж и успевав цела Партизанска да ја поминам за петнаесетина минути.

Секогаш сум сакала брзо да возам, но работите се сменија и јас си го сменив и велосипедот, па така пред повеќе од 15-тина години си го користам мојот дамски велосипед.

Продолжува на следната страница....