„Само еднаш му сменив пелена на синот и му ја наместив наопаку“: Димитар Андоновски за татковството

„Името на Михаил беше моја желба, сакав да го носи името на мојот татко, во негова чест. Сопругата го одбра името за второто дете. Уште кога се договоривме за Михаил, таа знаеше дека ако има втор син, ќе се вика Гаврил. Освен тоа, Гаврил на овој свет дојде на празникот Св. Гаврил Велички. За нас имињата имаат посебно значење, бидејќи тоа се имиња на двајца од седумте најголеми свети архангели“, вели Димитар Андоновски за CRNOBELO.com.

Димитар Андоновски (37) веќе 8 години е во брак со саканата Христина, со која има два сина. Михаил има 6 години, а помалиот Гаврил, се роди во јануари 2022 година и веќе има 16 месеци.

Пејачот секојпат со многу љубов зборува за семејството.

Тој не крие дека сопругата и синовите му се најважни од сè. Па, иако поради работата нема секогаш време за нив колку што сака, тој сепак секој слободен миг го поминува покрај семејството.

Во разговор за CRNOBELO.com Димитар ни раскажа за предизвиците со кои се соочил во татковството, кој ги избра имињата на децата и какво моќно значење имаат тие.

Ни откри и каков гаф направил кога сопругата го оставила сам со постариот син, а тој требал да му смени пелена.

Разговорот со Димитар Андоновски:

Какво беше чувството кога првпат ги зеде во раце синовите, се сеќаваш ли?

Како да не се сеќавам, тоа е момент кој се памети целиот живот.

Едноставно волшебен момент, полн со еурфорија, преплет на емоции, среќа.

Почувствував сосема нов облик на љубов.

Со првиот син чувството беше сосема ново, непознато, но веќе со вториот бев спремен за тоа што ме чека.

Имаше ли време да ѝ помагаш на сопругата Христина кога синовите беа бебиња? Си станувал ли ноќе за да ги заспиеш, нахраниш, да им смениш пелена?

Искрено, поради моите професионални ангажмани кои претежно немаат определено време и најчесто се во ноќните часови, ноќе не сум ѝ помагал секогаш.

Но, секое мое слободно време гледам да го поминам со нив и да помогнам што можам.

Како го минуваш времето со децата?

Времето со децата го поминувам релаксирано, играјќи друштвени игри, учиме нови работи, па знаеме и да музицираме, а ако е убаво времето, секако одиме во градскиот парк - нивното омилено место - за да прошетаме.

Кој е најголемиот гаф што си го направил како татко?

Сум немал многу гафови, освен тоа што кога првпат Христина ми го остави Михаил да го почувам, требаше да му сменам пелена, која му ја наместив сосема обратно од тоа како треба.

Продолжува на следната страница...