Петар Николоски живее во Порто: „Влагата во португалски дом е исто што и бубашваба во македонски дом“

Чист ли е градот? Како се справуваат со многуте туристи?

Чисто е. Се грижат и многу се свесни по тоа прашање. Нема преполни канти со отпадоци, нема ѓубре покрај контејнери, нема кабаст отпад на улица. Замисли, дури и изметот од кучиња го собираат во кесички! Едноставно, да ти е незгодно да фрлиш нешто на улица.

Во однос на туристите, туризмот е една од гранките која носи најмногу пари во Португалија, така што туристите ги имаат сите привилегии.

Нешто на што не можеш никако да се навикнеш од животот таму?

Во сè ставаат јајца! Бифтек со јајца, помфрит со јајце, сите кремови за слатки им се со јајца. Едноставно, премногу јајца.

Друга работа на која ми требаше време да се навикнам е тоа што воопшто не сакаат да се впуштаат во конфликти и да се објаснуваат, па најчесто применуваат игнорирање.

На пример, ако ти треба некоја услуга, се договараш со мајстор. Во еден момент се случува да дојде до прекин на комуникација – го бараш не се јавува, праќаш пораки, нема одговор.

Едноставно, постои застој но наместо да се објасни за истиот и потенцијално да влезе во конфликт со тебе, решава да те игнорира. И еден ден се појавува како ништо да не било и работата продолжува.

Овој пример со мајстори се реплицира на сите гранки – адвокати, лекари, администрација, буквално во секоја спора на општеството. Така што, ако некој не ти врати на повиците, мејловите и пораките, најверојатно има некој застој или нема нови информации и биди сигурен дека кога ќе има нешто ново, веднаш ќе ти се јават. 

И најважната работа – нема стрес, нема нервоза, нема гужва. Ама човек брзо се навикнува на тоа.

5 работи кои секој треба да ги има на ум пред да се пресели во Португалија? Кој беше најкорисниот совет кој ти го доби пред да заминеш?

Има еден куп бирократија, ти требаат нерви, ама работите се завршуваат.

1. Иако тврдат дека не ти треба греење и клима дома, без клима и се може, ама без греење ќе патиш. Освен ако немаш една соба која е на југозапад.

2. Влажно е, нонстоп.

3. Португалија е една од 5-те земји со најниски примања во Европа.

4. Законот дозволува цените да се качат еднаш годишно за процент кој е еднаков на официјалната стапка на инфлација, иако имаш договор за доверба од 24 месеци.

5. Совети пред одење добив многу, ама јас повеќе сакам да истражувам сам отколку да се потпрам на коментари и импресии од трети лица. Така што, дојди, види, пробај, реши.

Дали би останал на долг рок да живееш таму или можеби би сменил локација?

Времето ќе покаже. Сакам да го истуркам тој период на меден месец и потоа да направам уште една евалуација на моите потреби и тоа што Португалија ми го нуди како земја, па ќе видиме во која насока ќе се движат работите, ама знаејќи се себеси, тешко да се скрасам на едно место!

©CRNOBELO.com Забрането преземање и копирање. Крадењето на авторски текстови е казниво со закон.

Е. П. | Црнобело / фото: приватна архива