Јован Јованов за CRNOBELO: „Во Канада немам пријатели како тука, но државата има свои предности“

Детали

среда, 06 ноември 2024

„Малку е тешко да се споиме пак со момците од „Магија“, зашто јас живеам во Канада, а Зоки е во Австралија, па никогаш не сме заедно тука во исто време. Да бевме сите во Скопје, мислам дека одамна ќе направевме некоја нова песна“, вели Јован Јованов во интервју за CRNOBELO.com.

Едно од најзвучните имиња на македонската музичка сцена од крајот на 1990-тите и почетокот на 2000-тите години, Јован Јованов, скоро една деценија живее во Торонто, Канада.

И покрај тоа што ретко пее, не се откажува од музиката, а во Канада компонира и за тамошните изведувачи, но и за македонски музичари.

Со Јован се дружевме на Макфест во Штип, каде што е член на уметничкиот совет на фестивалот веќе три години и каде што направи топ журка на макфестовското афтерпарти во еден од штипските локали.

Но, потоа се сретнавме и во Скопје, каде што испивме кафе и разговаравме за многу теми кои се поврзани со него во изминативе 10 години.

Во интервјуто Јован ни раскажа за животот во Канада, за песните што му се веќе снимени и планира да ги промовира во 2025 година, за ќерката која има 12 години, но и за момците од групата „Магија“, со кои долго време беше неразделен.

Прочитајте го интервјуто:

Само што заврши уште едно издание на Макфест... Колку си задоволен од песните, организацијата, фестивалот воопшто?

Задоволен сум и од реакциите на публиката, но и од реакциите на естрадата и луѓето кои учествуваа на фестивалот.

Музиката пред сè треба да им се допадне на слушателите, а мислам дека оваа година од фестивалот ќе излезат неколку песни кои ќе се слушаат уште долго време.

Од организациска страна, бидејќи нели, бев директно вклучен во организацијата на фестивалот и како член на уметничкиот одбор, имаше работи кои би сакал да ги сменам и да ги подобрам за в година, но генерално сум задоволен.

Од сите песни на фестивалот, има ли барем една што се одвојува (според тебе) и која ти остави голем впечаток?

Песните ми се многупати преслушани, уште пред да се испеат на Макфест.

И да бидам искрен, не можам да издвојам една песна, зашто, како што кажав, има неколку песни што сигурно ќе останат да се слушаат и ќе бидат евергрини.

Ми се допаднаа неколку песни и од ревијалната и од дебитантската вечер, па не би издвоил една конкретно, но чекам да видам кои песни ќе се слушаат и кои млади изведувачи ќе се пробијат по нивниот настап.

По финалето на Макфест секогаш има афтерпарти, а годинава пееше и ти... Ти врати ли носталгија целата атмосфера кога излезе на бината - девојчиња во првите редови, фанови што скокаат и ги пеат твоите песни?

Па да, да, беше носталгично малку. Јас се чувствувам убаво кога сум на сцената и со ќеф го направив тоа. И имаше супер атмосфера.

Потоа отидов и на настапот на ДНК, кој беше во близина на клубот кај што се одржуваше макфестовското афтерпарти, па таму ја испеав „Магија“ и беше многу добро.

Со Пајак лани ја препеавте „Магија“. Дали мислиш дека ти е време за нова песна, да се вратиш на сцената?

Имам снимено неколку нови песни и планот ми беше да ги пуштам до крајот на оваа година, но, по сè изгледа, тоа ќе се случи следната година.

Имам и некои дуети кои не би ги открил сега, но мислам дека ќе им се допаднат на слушателите.

Продолжува на следната сатраница...