Д-р Маја А. Викторијоски е специјалист педијатар, дама со впечатлив моден стил, тетоважи и страст за јога и цртање

Детали

недела, 09 февруари 2025

Кога велиме инспиративни жени, тогаш мислиме на жените како Маја. Таа покрај врвен професионалец во неонатологијата е и модна икона и посветена мајка и жена со срце полно љубов кон животните и уметноста. За CRNOBELO.com проговори за својот животен стил и навики...

Маја Ангелеска Викторијоски (48), специјалист педијатар, по потекло e од Кичево, a во Скопје живеe од својата 15-та година.

Таа е дама со специфичен моден стил, кој вели дека е во насоката рок авангарда, и дама со страст за животот. Од тетоважи до цртање и животни, има низа интереси.

Има две големи ќерки, пред две години стапила во брак, а, покрај семејството, љубовта кон професијата е тоа што вистински ја исполнува.

Таа вели дека нема ништо поубаво од мигот кога ќе видите насмеани родители по прегледот на нивното новороденче кое е во одлична форма или одлично напредува.

Маја за CRNOBELO.com зборува за својот моден стил, професија и навики од секојдневието:

„Стилот не знам како би го дефинирала, модата за мене е форма на изразување на мојот карактер, љубовта кон естетиката, храброст да се биде различен и тоа ми се провлекува во секоја сфера на животот, не е само избор на облека, туку е огледало на мојата личност и расположение.

Конкретен стил немам дефинирано, но еве да кажам дека е во некоја насока на рок авангарда. Сакам да експериментирам со смели комбинации и детали што оставаат впечаток.

Во одредени пригоди преминувам на елегантен изглед, но секогаш додавам нешто по мое, нешто што го руши класичниот шаблон и ме прави различна. Тоа е стил кој го отсликува мојот дух и страст за слобода.

Модификацијата е мојот печат. Без разлика дали се работи за класично или модерно парче, го адаптирам според моите стандарди, додавајќи лична нота што го прави автентично и едно знам, никогаш не сум практична во изборот на гардероба.

Едноставно, сакам да носам парчиња што зборуваат за мене, без разлика дали се удобни или не.

Никогаш не го врзувам стилот за мојата возраст или професија. Верувам дека облеката треба да ја одразува личноста, а не очекувањата на околината. Едноставно, јас сум јас – секогаш доследна на својата визија.

За мене, модата е уметност. Не се водам по правила или трендови – ги создавам своите стандарди, бидејќи модата не е само облека, туку дел од мојата лична приказна.

Не сум колекционер и не бројам што и колку поседувам, бројките не ми значат ништо. Модата, за мене, не е за поседување, туку за уживање.

Ако нешто веќе не ми се допаѓа или не ме инспирира, без двоумење го подарувам, а често подарувам парчиња и на некој што ќе изрази желба за нив, не се врзувам за материјалното.

Препознатлив детаљ во изгледот ми се шишките, кои ги носам последниве години, и никогаш не се исти, затоа што сама ги потстрижувам.

Тетоважи имам, но не толку колку што би сакала да имам. Уште како мала се цртав со пенкало на рацете.

И тие, исто така, се мој начин на изразување и секоја од нив има своја приказна и значење.

Продолжува на следната страница...