Роберт Коцев, колекционер на часовници: „150 часовници ме потсетуваат на детство, знам и да ги поправам“

Детали

понеделник, 23 јануари 2023

За нив велат дека секогаш се актуелни, но само ја менуваат формата – часовниците. Изминатите петнаесет години низ својата пасија тоа најдобро го искусил Роберт Коцев.

Роберт Коцев (53) од Радишани, Скопје е семеен човек по професија офицер на Армијата со чин мајор.

Негово хоби е уметноста со дрво, како и колекционерството на стари часовници и антиквитети. 

Не е сигурен како почнал, но повеќе од уверен е дека со своите 150 часовници изминатата деценија и половина постојано е среќен како дете.

Низ насмевка, за CRNOBELO.com се присетува на времињата кога како дете уживал во звукот од часовникот кој едноставно го смирувал и инспирирал и ни открива детали за своето хоби...

„Толку многу се грижам за мојата колекција што дури комплетно ги проучувам механизмите на часовниците. Многу често знам да го отворам механизамот и да поправам нешто доколку не е во ред.

За жал, многу често се случува некој дел да е скршен, а да нема резервен, бидејќи се работи за антиквитети и така часовникот станува само сувенир“.

За него секој часовник има приказна која сама по себе е нераскажлива. Иако ниту еден часовник не наликува на друг, сите се купени од Македонија.

Коцев вели дека не се сеќава со кој часовник почнала целата приказна.

Во тишината која ја разбиваше звукот од 150 часовници во колекцијата на Роберт Коцев, тивко стоеше еден руски часовник.

Тој одамна ја имаше запечатено својата историја. Коцев се присети дека и тој, како и останатите, е купен од локалните пазарчиња.

„Ја имам среќата што многу земји, особено во време на Југославија имаа развиено продажна мрежа во Македонија па често можеа тука да стигнат разни видови на часовници, кои денес се антиквитети.

Повеќето во колекцијата ми се и од земји надвор од Југославија, а добар дел се од брендовите Инсан и Восток“, раскажува Коцев додека ги навива некои од будилниците. Со неизмерна гордост на својата колекција, Роберт вели дека сака на идните генерации да им покаже како некогаш се мерело времето.

Пасијата со часовниците ја споил со дарбата за уметност од обработка на дрво.

„Креативноста е таа што ме води. Секој од рачно изработените часовници на дрвена подлога е уметност сама по себе. Во секој од нив целосно сум ја внел мојата моментална инспирација, но и знаење како би го добил тоа што е веќе слика во мојата глава“, раскажува Роберт.

Ако часовниците се симбол за време, а за него велиме дека е скапоцено, се чини дека Роберт Коцев е навистина богат човек.

Нè покани на повторна средба и нови приказни за неговите часовници кои само се надополнуваат, но никогаш не заминуваат од полиците.

©CRNOBELO.com Забрането преземање и копирање. Крадењето на авторски текстови е казниво со закон.

Д. Б. | Црнобело