Стоматологот Иван Шутаров: „Плакнете ги со вода забите по јадење портокал, но не ги четкајте веднаш по оброк“

Дали белеењето на забите ги оштетува?

Зависи. Постојат различни средства и методи со кои може да дојде до избелување на нашите заби. Некои од нив, можат да имаат штетно дејство.

Но, избелувањето на забите кое е направено од страна на стручно лице во стоматолошка ординација, со употреба на адекватни средства и методи е сосема безбедно и без никакво оштетување на забите. 

Кои се најчести проблеми со забите кај помладите, а кои кај постарите?

Најчестиот проблем кај младите е појавата на кариес на забите, додека кај постарите е пародонтопатијата (расклатени заби).

Дали треба да ги плакнеме забите веднаш откако ќе јадеме нешто кисело како портокал/мандарина? Дали навистина ги нагризуваат?

Да. Според pH вредноста тие предизвикуваат кисела средина во нашата уста, и го нагризуваат површинскиот слој на забот -  емајлот/глеѓта.

Доколку внесуваме таков тип на храна и пијалаци, треба да ја исплакнеме устата со малку вода за да ја намалиме киселоста.

Но, никако не смееме да ги четкаме забите веднаш потоа, бидејќи глеѓта е веќе нагризана од киселоста и четкањето може да направи повеќе штета.

Дали треба да се мијат забите веднаш по јадење?

Не треба. Како што веќе напоменав во претходното прашање, доколку сме консумирале храна и пијалаци (портокали, лимони, грејпфрут, кафе, итн…) кои предизвикуваат кисела средина во нашата уста, не смееме да ги четкаме забите.

Најдобро е да ја исплакнеме устата само со вода, и да почекаме минимум 1 час пред да ги четкаме забите.

Тоа е време кое е потребно за нашата плунка природно да ги разгради и измие честичките од храна и да ја врати pH вредноста во устата на соодветното ниво.

Доаѓаат ли луѓе со барања за холивудски бела насмевка? Возможно ли е тоа да се постигне?

Секојдневно доаѓаат луѓе кои сакаат бели заби и блескава насмевка, и тоа е сосема нормално. Со помош на избелувањето на забите не е возможно да се постигнат премногу бели заби, но со помош на протетските изработки да.

Меѓутоа, ние во нашата ординација се стремиме забите кои ги правиме да изгледаат што поприродно, па така и пациентите кои доаѓаат кај нас знаат и очекуваат бели заби, но сепак да изгледаат природно - да не бидат вештачки бели. 

А самото тоа е и поголем предизвик за нас, бидејќи многу е потешко да изработите заби кои изгледаат како природните, со сите анатомо-морфолошки карактеристики кои ги имаат нашите природни заби.  

©CRNOBELO.com Забрането преземање и копирање. Крадењето на авторски текстови е казниво со закон.

Симона Симионова | Црнобело