Влатко Груевски, оперски пејач: „Наутро слушам поп музика или турбо фолк, 2 часа пред настап не разговарам со никого“

Каква музика повеќе сака да слуша македонската публика – класична или забавна и дали сметаш дека со изведбата на поп и модерна музика можеш повеќе да ѝ се доближиш на публиката?

Морам да бидам искрен дека македонската публика е слушател со истенчен вкус. Знаат македонските слушатели што е добро и што заслужува пиедестал.

Во однос на класичната и забавна музика, секоја музика си има слушатели, но она кое мене ме воодушевува моментално е тоа што тој склоп на класична со забавна музика и испејувањето на познатите забавни мелодии со оперски глас, во моја изведба, наиде на огромен поздрав од страна на публиката.

На првиот таков концерт се сеќавам, голем број на јавни личности од музичкиот свет, актери, водители, организатори, спортисти, професори од ФМУ, беа воодушевени од тој склоп, а најубавиот коментар беше дека, прекратко траеше, а концертот беше во траење од 1 час и 20 минути.

Искрено не беше намерата со овој проект од перспектива да јас се доближам на публиката преку тоа, него класичната музика да ја доближам до поголем број на слушатели, а како слушател на сите жанрови, само поп музиката ми е мост кон тоа, така што, ќе го продолжам тоа до онаа максимална граница, а исходот ќе го видиме на крајот.

Колку често ти се случува да патуваш за настапи и кој е според тебе најубавиот град што некогаш си имал можност да го видиш?

Ако зборуваме за низ нашата Македонија, одма ќе кажам дека не сум застанал, а неретко и надвор од границите, но многу помалку, тоа е бидејќи сум повеќе насочен кон домашната сцена.

Кај нас уживам во сите градови, сите имаат нешто свое да понудат, свој печат и баш тоа ми се допаѓа, а во светот за мене најубав град е Милано, уживам во неговиот дух, модата, начинот на живот на неговите граѓани, архитектурата, чувството дека таму е една од најпрестижните оперски куќи „Ла Скала“, ме воодушевува функционирањето на трамвајот со број 1 кој датира од 1881 итн.

Која е сцената каде посакуваш да настапуваш некогаш кога би имал прилика за тоа?

Многу ги има, еве нека биде кај нас античкиот театар „Хераклеа“ и во Милано на сцената на оперската куќа „Ла Скала“.

Постојат ли одредени пијалаци или храна што одбиваш да ги консумираш за да го заштитиш гласот?

Единствено избегнувам да пијам ладна вода.

Откриј ни 3 тајни за себе што никој не ги знае.

Не сакам хорор филмови, сакам да одам на шопинг сам и не сакам кога ми се допира облеката.

Кога не би бил оперски пејач, тогаш би бил...

Политичар, се шегувам, најверојатно архитект или филмски актер. 

©CRNOBELO.com Забрането преземање и копирање. Крадењето на авторски текстови е казниво со закон.

Б. С. Б. | Црнобело