Српскиот претставник на Евровизија: „Имам ментално нарушување, во себе имав мал демон што не ми даваше да настапувам“

Детали

сабота, 25 март 2023

„Имам ментално нарушување заради кое имам слаба свест за стварноста. Мојата состојба стручно се нарекува F23.8, всушност нема посебно име, а е слично со гранично нарушување на личноста“ - откри српскиот претставник на Евровизија, Лук Блек.

Изборот на Лук Блек за српски претставник на Евровизија во голема мера ја изненади тамошната јавност, а пејачот кој годинава треба да отпатува во Ливерпул не престанува да ја бранува јавноста со своите изјави.

Лука Ивановиќ, кој на јавноста ѝ е попознат како Лук Блек, деновиве отворено зборуваше за својот приватен живот и откри дека има сериозно нарушување на личноста.

„Пред пет години одлучив дека не сакам веќе да се занимавам со музика. Бев разочаран од публиката во Србија, затоа што не ме прифатија.

Инаку имам ментално нарушување заради кое имам слаба свест за стварноста. Мојата состојба стручно се нарекува F23.8, всушност нема посебно име, а е слично со гранично нарушување на личноста.

Да се вратиме на темата. Му пуштив на татко ми да слушне некои мои песни и му реков дека морам веднаш да одам во Англија.

Сонував да студирам таму, но кога имав 18 години тоа не можевме да си го дозволиме, па на 27 одлучив да се запишам на универзитет“ – вели тој.

Лук тврди дека имал многу голема трема од јавните настапи во минатото, а според него, за тоа е виновен некој мал демон што не му дозволува да настапува.

„Сакав да го победам (тој демон). Тоа беше мошне голем предизвик за мене и ментално и физички, но на крајот се пријавив и победив“ – рече тој за Popjustice.

Лук откри и дека честопати му се случува да ги фотошопира фотографиите на социјалните мрежи и најчесто ја бои облеката што ја носи, затоа што нема секогаш пари за да си купи нешто ново.

Тој откри дека пластичниот јастог што се шета со него, го нарачал онлајн една вечер додека бил пијан, па заборавил. Кога стигнала пратката тој бил преплашен.

„Неколку дена не можев ниту да го допрам. Не бев само јас драматичен заради 'миленикот', туку и мојот цимер“ – вели Лук.

Инаку, во Србија се поделени мислењата на јавноста околу изборот на Лук Блек за претставник на Евровизија, додека едни сметаат дека тој заслужил да оди во Ливерпул, други тврдат дека победил само затоа што е внук на Констракта.

Прочитајте и Констракта му е идол, се шета со пластичен јастог – Лук Блек e српскиот претставник на Евросонг 2023

Б. С. Б. | Црнобело