Видеа со ајкули во Грција кружат на социјалните мрежи – На кои туристички места поточно се снимени?

Професорот по Биологија на универзитетот „Аристотел“ во Солун, Танасис Циклерас зборуваше за „појавата“ на ајкулите во грчките мориња и за видеата објавени на социјалните мрежи.

Како што посочи, во видеото снимено во Серифос, најверојатно станува збор за сина ајкула, која може да достигне должина од 4 метри и тежина од 250 килограми.

Видеото е снимено на брегот на Горбиа, карпест остров во делот на Кикладите во Егејското море, а ајкулата била снимена на 80 метри оддалеченост од брегот.

„Тоа е врвен предатор, како најголемиот дел ајкули. Може да нападне ако ја испровоцирате, иако не ги гледаме често.

Има бели ајкули во Егејското Море, но можноста да нападнат човек е минимална“ – вели тој.

Според него, ако случајно наидете на ајкула во грчките мориња, најдобро е да се држите настрана и да се потрудите да не ја провоцирате.

Инаку, во грчките мориња живеат околу 60 различни видови ајкули, кои најчесто не се опасни за луѓето и покрај тоа што се мошне големи.

„Најчесто се среќава големата ајкула која се храни со планктони и со ракчиња“ – појаснува Циклерас.

Ајкулите најчесто може да се забележат во водите на Јонското Море, во јужниот дел на островот Крит, во Коринтскиот Залив и околу Халкидики.

Инаку, во грчките мориња е забележан само еден напад врз човек од ајкула во 1951-ва година, кога 16-годишната Вада Пери од Крит, според медиумите од тоа време, била повлечена од ајкула додека пливала на плажата Мон Репо.

Прочитајте и Големи ајкули, делфини и китови – Какви животни живеат во морињата во Грција и каде можете да ги забележите?

Б. С. Б. | Црнобело