Големи ајкули, делфини и китови – Какви животни живеат во морињата во Грција и каде можете да ги забележите?

Дали треба да кревате паника доколку забележите перка од ајкула во близина на Родос, а каде треба да одите ако сакате да пливате со делфини или желки? Пет видови морски животни што живеат во морињата околу Грција и каде може да ги видите?

Сезонава главна тема се виолетовите опасни медузи што го окупираа крајбрежјето во Грција. Знаете ли кои други животни живеат во водите на Егејското и Јонското Море и каде можете да ги забележите?

Од морски животни што се на раб на истребување, до огромни ајкули, Грција освен што има прекрасни плажи и туристички и историски места, таа е совршена дестинација и за љубителите на морските видови.

Кои пет морски животни може да се забележат во водите околу Грција и дали треба да бидете внимателни со нив?

Средоземна фока – мечка

Станува збор за едно од најретките морски животни во Грција. Се смета дека во природата се останати само околу 600 живи средоземни фоки-мечки и вистинска реткост е да успеете да ги забележите.

Секое откривање на нова колонија на средоземни фоки во Грција се чува во најголема тајност, со цел да се заштити овој загрозен вид животни.

Сепак, посетителите на тематскиот морски парк на островот Алонизос во Егејското Море имаат можност да го видат и овој редок морски вид.

Кит кашалот

Најголемото животно што живее во водите на морињата околу Грција е китот кашалот или најголемиот забест кит.

Кашалотот може да достигне должина од околу 20 метри и тежина од 60 тони, а познато е дека живее во големи длабочини, па најчесто може да се забележат во средишните делови на Егејското Море.

Во периодот од мај до септември овие китови може да се забележат и покрај бреговите на островот Миконос.

Делфини

Доколку имате желба да видите делфини во природа, тогаш ваша следна дестинација би требало да биде Коринтскиот Залив во Јонското Море.

Мирните води на заливот дозволуваат полесно да се забележат овие брзи и темпераментни животни, но тие може да се забележат низ повеќе места во морињата околу Грција. 

Морски желки

Во водите околу островот Закинтос можете да очекувате да забележите поголем број морски желки, што често доаѓаат до копното за да положат јајца, а грациозно пловат низ морските води.

Во периодот од мај до јуни тие најчесто се во близина на брегот и очекуваат да се приближат до плажата за да ги положат јајцата, а многу почесто можете да ги забележите на копното отколку во водата.

Големи ајкули

Тие се втора по големина риба во семејството ајкули, но за разлика од некои нивни роднини што ги напаѓаат другите живи видови, овие морски животни се хранат со планктон и мали ракчиња.

Во околината на Родос честопати може да се забележат заради нивните огромни перки, а нуркачите во овие предели уживаат да пливаат со нив.

Б. С. Б. | Црнобело