Затрупани куќи и автомобили – Апоколиптични глетки од поплавите во Словенија

Детали

вторник, 08 август 2023

„Ова изгледа нереално“, „Сега ми е јасно како цели градови останале избришани, страшно“ - стои во дел од коментарите на видеото на кое се гледа како во словенечки Камник по поплавите цели автомобили и катови од куќи останале затрупани под земја.

Невреме со силен ветер и дожд беснееше неколку денови во Словенија, а земјата неколку дена подоцна сѐ уште се справува со последиците. По силните поплави што ја зафатија земјата на 4-ти август годинава, на социјалните мрежи кружат апокалиптични сцени, кои никого не оставаат рамнодушен.

Еден од најпогодените делови во земјата е општината Камник, каде жителите неколку дена останаа отсечени од светот, затоа што се срушени неколку мостови, а жителите немаат вода за пиење затоа што е оштетен системот за водоснабдување.

Силните поплави од 4-ти август предизвикаа рушење на патиштата, ерозија на земјиштето, а неколку денови на жителите им се доставува вода за пиење со цистерни.

На социјалните мрежи од општината е објавено видео на кое се гледа дека водата со себе носела толку големо количество песок и земјен материјал што во некои делови од општината цели катови од куќи и цели автомобили се прекриени.

@avtomehanik1993

♬ original sound - avtomehanik

„Ова изгледа нереално“, „По неколку века ќе речат дека ова е нов слој од цивилизацијата“, „Сега ми е јасно како цели градови останале избришани, страшно“ – коментираат дел од оние што имаа можност да го погледнат видеото.

Инаку на Твитер масовно се споделуваат и видеа на кои се гледа како жителите масовно работат на расчистувањето на теренот во повеќе словенечки градови.

За време на поплавите пак беше објавено и едно видео на кое се гледа како двајца алпинисти што со себе имале опрема за алпинизам со јажиња извлекуваат една жена која останала заробена во автомобилот.

Исто така, речиси во сите медиуми се пренесе приказната за храбрите пожарникари кои помогнаа да се спасат 22 дечиња од градинка во Менгеш, а меѓу нив беше и Санди Зајц, кој додека им помагаше на дечињата остана без покрив на главата.

Б. С. Б. | Црнобело