Турција не ја заборава помошта за земјотресите од Македонија - училиште ќе го носи името на нашата држава

Детали

вторник, 05 септември 2023

Училиштето ќе го носи името на нашата држава, а училниците имињата на македонските градови. Како Турција се заблагодарува за помошта од нашата земја по земјотресите?

За време на катастрофалните земјотреси што ја потресоа Турција во февруари годинава, граѓаните од Македонија се сплотија за да им помогнат на жителите на погодените региони.

Во знак на благодарност училиште во областа Малатија ќе го носи името на нашата држава, а секоја од училниците во објектот ќе го носи името на некои од градовите во нашата земја.

Како што соопштуваат турските медиуми, изградбата на училиштето ќе чини околу 1 милион евра, а досега се собрани вкупно 941.000 евра.

„Црвениот крст на Република Северна Македонија по направените преговори со Турската Црвена Полумесечина, на заеднички предлог, одлучи собраните хуманитарни средства во износ од 50.909.796 денари, да се наменат за изградба на училиште во градот Малатија.

Новото училиште ќе го носи името на нашата држава, а 32 училници ќе ги носат имињата на градовите на нашата држава“ – велат од Црвениот крст на Република Македонија.

Б. С. Б. | Црнобело