„Мислев дека е само настинка, но на крај ми ги ампутираа нозете“: Анита од Загреб е вистински борец

Детали

недела, 21 јануари 2024

„Мислев дека станува збор за најобичен вирус, бидејќи и претходно сум се разболувала. Сепак, беше нешто многу посериозно од тоа. Кога се разбудив од кома ми беше многу тешко. Моите родители ми ја објаснија целата ситуација, дека ќе биде неопходна ампутација“, раскажува Анита од Загреб на која ѝ биле ампутирани двете нозе поради менингококна сепса.

Анита Маркуш (22) од Загреб, Хрватска и покрај тоа што останала без двете нозе поради труење на крвта, го задржала ведриот дух и позитивната енергија. 

Не дозволила ништо да влијае врз нејзината волја за живот.

Во интервју за хрватска телевизија, Анита ја раскажа својата приказна и објасни дека ампутацијата на двете нозе е последица на тешка менингококна сепса.

Анита не знае како се заразила со таа бактерија, но храбро ја издржала борбата да се ослободи од неа.

Нагло кренала температура над 40 степени и имала силна треска. Во еден момент почувствувала силна топлина, како да мора да се истушира со студена вода, но кога се обидела да дојде до бањата воопшто не ги чувствувала нозете.

Со брза помош била однесена во болница, каде веднаш била ставена во индуцирана кома, затоа што чувствувала силни болки.

Реанимирана била 3 пати, а од кома била разбудена после еден месец.

„Мислев дека станува збор за најобичен вирус, бидејќи и претходно сум се разболувала. Сепак, беше нешто многу посериозно од тоа. Кога се разбудив од кома ми беше многу тешко.

Моите родители ми ја објаснија целата ситуација, дека ќе биде неопходна ампутација, дека лекарите се бореле и ми го спасиле животот и дека можело да биде многу полошо отколку што било“, раскажува Анита.

Нова протеза со микропроцесорски електронски колена, добила благодарение на помошта на добрите луѓе и хуманитарната акција што ја организирале. 

Цената на оваа протеза е околу 60.000 евра.

Денес, на Анита не ѝ требаат патерици или други помагала, а таа вели дека оваа протеза ѝ го олеснила животот.

Анита студира социјална работа на Правниот факултет во Загреб и сака да им помогне на луѓето кои се нашле во иста или слична ситуација во животот.

„Ми се случи тоа што ми се случи и мислам дека сум добар пример за луѓето дека и покрај сѐ, можеш да продолжиш понатаму.

Треба да продолжиме со животот, треба да бидеме оптимисти и да прифатиме сѐ што ни се случува и да се бориме“,  вели таа.

Што е менингококна сепса?

Менингококната сепса е сериозна состојба која често има многу неповолен исход. 

Раната дијагноза и брзото започнување со лекување придонесуваат за подобар исход. 

Предизвикувачот на менингококната сепса е бактерија со официјално име Neiserria meningitidis,  попозната под името meningococcus. 

Инфекцијата се пренесува преку капки што заразеното лице ги исфрла во околината при кашлање и кивање, иако поретко може да биде и преку директен контакт.

Сепса значи навлегување на микроорганизми во крвта и воспалителна реакција на нашето тело на бактериите во крвта. 

Раните симптоми на менингококната сепса се: ненадеен почеток на болеста, покачена температура, раздразливост, главоболка, повраќање, а посебно внимание треба да се посвети на промените на кожата, т.н. петехии. 

Петехиите се точкести крвавења на кожата предизвикани како резултат на васкулитис (воспаление на крвните садови) на кожата.

С. Ш. | Црнобело / фото: Фејсбук