Мајката на српската претставничка на Евровизија: „Влашките гатачки ѝ предвидоа успех“

Детали

четврток, 07 март 2024

„Јас сум магистер по антропологијата и се занимавам со човековите верувања и мислења, а магијата е првото човечко верување“ – појаснува мајката на Теодора Павловска, претставничката на Србија на Евровизија. Таа откри што ѝ предвиделе влашките гатачки за ќерката.

По победата на Теодора Павловска, попозната како Теја Дора, на српскиот избор за Песна за Евровизија, српските медиуми покажаа голем интерес и за нејзината мајка Јасна Јојиќ, која е добар познавач на влашката магија и на таа тема објавила неколку книги.

Таа даде интервју за српски Blic, каде зборуваше за нејзиниот интерес за магијата, но и за тоа што ѝ предвиделе гатачките за нејзината ќерка.

„Јас сум магистер по антропологијата и се занимавам со човековите верувања и мислења, а магијата е првото човечко верување.

Јас малку повеќе се насочив на развојот на магијата во областа каде што сме родени јас и Теодора и многу го сакаме тој крај.

Прво правев репортажи за влашката магија и правев и интервјуа со бабите што се занимаваат со влашката магија“ – вели Јасна.

Таа потоа целиот материјал од интервјуата го собрала во книги коишто ги објавила, а тврди дека запознала голем број видовити луѓе во чијашто моќ за предвидување се уверила врз основа на нивните остварени пророштва.

фото: Јутјуб - принтскрин

На прашањето дали некој од тие видовити луѓе го предвидел успехот на Теодора, Јасна одговара:

„Да! Секогаш пред да им направам интервју на некои од гатачките, барав прво да ми кажат мене нешто од минатото за да знам дали станува збор за измамници.

Една жена го предвиде патувањето на Теодора во Америка. Ми рече дека гледа големо море и дека детето ќе ми замине таму и дека таа ќе има голем успех.

Инаку, јас исто така многу ја сакам и астрологијата, а наталната карта на Теодора ми покажа дека таа ќе оствари голем успех“.

Инаку, таткото на Теодора е ликовниот уметник Гандра Драган Павловски, кој живеел во Кипар додека таа била мала.

Така, пејачката во лето била кај него, а во текот на учебната година со мајка ѝ во Бор во Србија.

Интересно е тоа што, кога немало кој да ја чува и Теодора одела заедно со мајка ѝ на работа и присуствувала за време на дел од нејзините репортажи.

Прочитајте и Која е Теодора Павловска – Девојката што ќе ја претставува Србија на Евровизија?

Б. С. Б. | Црнобело