Потег за почит: Жена од Сплит нуди бесплатно сместување за мајка со дете кои немаат пари за летување

Детали

понеделник, 01 јули 2024

„Би сакала да се пријави мајка со дете, по можност детето да има година до година и пол за да може да се дружи со моето, а мајката и јас да сме во слични фази, па да имаме теми за разговор“, пишува сплиќанката која сака да остане анонимна, а нуди бесплатно сместување во својот дом.

На хрватската Фејсбук група „Тајни на мајките, анонимни и јавни“ една објава деновиве привлече многу внимание.

Во групата, во која повеќето жени споделуваат свои искуства или поставуваат интимни прашања, една анонимна предизвика воодушевување.

Имено, жена од Сплит, нуди бесплатно сместување за мајка и дете кои не можат да си дозволат да одат на летување бидејќи немаат пари, а нуди и да им го плати и патот од нивното место на поаѓање до Сплит.

„Поздрав драги мајки. Живеам во Сплит, а бидејќи сопругот ми е често на терен, со недели сум сама со мојата ќерка во голем стан.

Па дојдов на идеја да угостам некоја мајка со дете, кои немаат пари да отидат на море. Имам гостинска соба, имам автомобил, а плажата ни е на 5 минути со автомобил.

Би сакала тоа да биде само мајка со дете, по можност детето да има година до година и пол за да може да се дружи со моето, а мајката и јас да сме во слични фази, па да имаме теми за разговор“, пишува жената.

Таа открила дека е на породилно отсуство и дека има многу време, но и дека има еден услов за мајката што би дошла на „гости“ кај неа:

„Е, да, единствениот услов е ни мајката ни детето да не се плашат од големи кучиња, бидејќи имам едно дома. Ако сте заинтересирани, ве молам оставете ми ја во коментар вашата возраст и возраста на детето.

Ако имате две деца и тоа нема да е проблем, ако со себе донесете патно креветче за бебето. Се надевам дека на овој начин ќе стекнам ново пријателство.

Исто така, ни патот не е проблем да го платам ако се договориме за останатото“, пишува во објавата.

Овој анонимен статус предизвика многу пофалби и позитивни реакции.

„Кога би имало повеќе вакви луѓе“, „Прекрасен гест“, се дел од коментарите.

А има и такви кои велат дека би сакале да ја дознаат и разврската на приказната, па побараа од анонимната мајка во некој иден пост да раскаже како си поминале.

А. Ј. | Црнобело / фото: depositphotos.com