Со багери и камиони се тргаат лежалки и чадори на Халкидики: „Не се ваша сопственост“

Детали

среда, 24 јули 2024

Сите што имаат оставено чадори и лежалки на плажите во Касандра, треба вечерва (24.07) да ги отстранат, затоа што ќе им бидат одземени. Општината Полигирос, пак, вчера објави фотки од масовната акција за расчистување на нивните плажи.

Слично како и лани, така и годинава властите во повеќе општини на Халкидики во Грција отпочнаа или најавија дека ќе отпочнат со расчистување на врзаните чадори и лежалки, чија цел е да го чуваат резервирано местото на плажа.

Во изминатите денови се спроведе голема акција за расчистување на напуштените лежалки и чадори на плажата Каливи во општината Полигирос.

На официјалната Фејсбук страница на општината Полигирос вчера (23.07) беа објавени повеќе фотографии од моментот на расчистувањето.

Се гледа дека властите со помош на камионети и багери утрото, околу 6.30 часот, ги отстраниле сите нелегално поставени реквизити на плажа, што ги затекнале таму, а имале за цел да го чуваат местото резервирано во текот на ноќта.

„Веќе еден месец наназад информиравме дека ќе продолжиме да ги расчистуваме плажите на кои има чадори и лежалки, затоа што тие се поставени нелегално.

Не е во ред тоа што некои туристи се однесуваат како плажите да се во нивна сопственост. Можеби во изминатите години ја толериравме оваа нелегална активност, но на ова мора да се стави крај“ – велат тамошните власти.

Во изјава за тамошните медиуми, од општината информираат дека дел од туристите што сфатиле што се случува, побрзале да си ги земат лежалките и чадорите.

Оние, пак, што не успеале да го направат тоа, ќе може да си ги подигнат од Службата за хигиена во општината Полигирос.

Освен во оваа општина, во текот на вчерашниот ден беше издадено предупредување и на Фејсбук страницата на општината Касандра, од каде известија дека почнувајќи од 25.06 (четврток) и кај нив ќе се отпочне со расчистување на плажите.

„Општината ќе започне со отстранување чадори, лежалки и каков било вид на прицврстени конструкции, кои се поставени од страна на туристите на плажите, а се со траен карактер.

Нивното поставување и трајниот престој е нелегален. Сите напуштени реквизити ќе бидат отстранети како загадувачи“ – се вели во соопштението.

Б. С. Б. | Црнобело