„Сите забележуваат кога си ненашминкана, никој не ја забележа девојката која бегаше од маж со пиштол“ – Потресно видео по фемицидот во Босна

Детали

среда, 19 ноември 2025

На 16-ти ноември, млада жена од Босна беше убиена од нејзиниот поранешен партнер. Ја бркал со пиштол низ Мостар, за на крај да ја застрела и убие во хотелскиот тоалет во којшто се скрила. Со потресни пораки, блиските се збогуваат од Алдина, а инфлуенсерка сподели и трогателно видео.

Семејното насилство, кое некогаш кулминира и со фемицид, за жал, не е нешто непознато на Балканот.

Кај нас и во секоја околна земја сме гледале како жени стануваат жртви на нивните (поранешни) партнери, и покрај тоа што многупати барале помош од надлежните.

Уште полошо е што некогаш жените се дури и обвинувани за насилството што го трпеле.

Последно во низата вакви трагедии е убиството на Алдина Јахиќ – 32-годишна девојка од Мостар чиј поранешен партнер ја бркал со пиштол.

Убиецот на Алдина е Анис Калајџиќ, 33-годишен фудбалски судија.

На кобната ноќ на 16-ти ноември, Алдина сакал да оди во теретана, кога ја начекал убиецот Анис и извадил пиштол.

Алдина почнала да бега, а додека трчала по улицата викала дека Анис има пиштол. Но, никој не изреагирал и Алдина продолжила да бега, за да се скрие во тоалетот во еден хотел.

Анис бил со автомобил, застанал пред хотелот, влегол внатре и ја застрелал Алдина.

Наводно, додека се криела во хотелот, Алдина успеала да повика и полиција, но залудно. Анис, кој е син на познат босански фудбалер, бил уапсен веднаш.

Според босанските медиуми, пиштолот го набавил неодамна, наводно поради заканите што ги добивал како фудбалски тренер.

Алдина имала само 32 години, а нејзиното убиство, кое сигурно можело да биде спречено, повторно ја разбранува јавноста и ги поттикна дебатите на тема фемицид.

Се огласија познаници и пријатели на Алдина, но и јавни личности. Инфлуенсерка Мерима Џелиловиќ сподели трогателно видео на Инстаграм:

„Сите забележуваат кога ноктите ќе ти пораснат половина сантиметар, забележуваат ако имаш пет килограми вишок. Те застануваат кога не си нашминкана да те прашаат дали си добра.

Застануваат, забележуваат, за тоа сите имаат очи. Никој не ја забележа девојката која бега од маж со пиштол среде Мостар.

Не гледаме околу себе, не гледаме ни во себе. Во што гледаме? Веројатно сè што е подлабоко од шминка, никој не го интересира.

Една девојка умре, престана да бара помош. Коментари од жени, коментари од мажи – 'сама е крива'. Коментари од идиоти.

Замисли го нивото на срам на луѓето кои коментираат мртва девојка и бараат изговор за монструмот. Меѓу какви луѓе живееме? Ако жртвата може да биде виновна, на кого воопшто му е дозволено да биде невин?

И, тогаш доаѓаме до мажите. До нашата балканска парада на тестостерон и празни приказни. Каде се бицепсите фотографирани под неонско светло? Каде се кога жените умираат?

Вистинска машкост е да имате 'кичма', да речете ’не, јас ќе ја заштитам‘. Да ја заштитите, да реагирате, не бидете кукавици кога злото стои три метра од вас. А, уште полошо, да коментирате дека девојката е виновна.

И, тоа е убиство и на таа девојка и тебе и мене и на секоја жена која оди по оваа планета. Јас не го кажувам ова за да звучам паметно, го кажувам бидејќи сум гневна и нема да молчам. Никогаш.

Штета што оваа приказна ќе биде заборавена за неколку денови. Штета што Босна и Херцегвина е држава во која убиецот има право да земе оружје, да добие дозвола, иако неговата девојка го пријавувале повеќепати.

Додека имаме општество кое ги обвинува жените, а ги правда монструмите, ќе продолжиме да погребуваме девојки. Прости ни, Алдина“.

Продолжува на следната страница..