Силно невреме и ветришта и во Албанија – има двајца загинати, откорнати дрвја и уништени автомобили (видео)

Детали

четврток, 23 јули 2026

Од бурата и силниот ветер што беснееше низ Македонија, беа зафатени Босна, но и Албанија – Саранда и околината беа погодени од ветришта кои откорнаа цели дрвја, оштетија автомобили, рибар бил пронајден мртов во море кај Ксамил, а загинал и електричар кој поправал дефект од бурата.

Пред два дена Македонија беше погодена од силно невреме, со екстремно јаки ветрови чија брзина достигна ниво на ураган, до 134km/h.

Бурата предизвика големи материјални штети низ повеќе наши градови, беа откорнати и паднати дрвја, оштетени автомобили, излетаа цели кровови, а имаше и неколку повредени.

Невреме косеше и низ Босна, но и низ Албанија, каде неколку крајбрежни региони, но и делови од внатрешноста на земјата, беа погодени.

Во Саранда и околината, беа предизвикани повеќе материјални штети, патиштата беа блокирани, а силниот ветер и таму откорнал дрвја кои оштетиле повеќе автомобили, иако бурата траела кратко време, исто како кај нас.

Освен неколку повредени, кои претежно биле исечени од скршено стакло, за жал во бурата има и две жртви, како што пренесува AlbanianDailyNews. 

61-годишен рибар бил пронајден мртов во морето во околината на островот Ксамил, за кој се верува дека бил превртен заради разбеснетото море среде невремето, но сепак случајот се истражува.

Животот го загубил и 54-годишен електричар, кој бил вработен во електроенергетска компанија, додека поправал дефект во електричната мрежа во регионот Химара, откако невремето предизвика прекин на електрична енергија.

На страницата на Ксамил Албанија на Фејсбук, вчера споделија објава од сончево време и напишаа дека по бурата од претходната ноќ, сè функционира нормално и ги очекуваат туристите на плажа. 

М. М. | Црнобело