Србин преку Фејсбук ја бара својата прва љубов од Грција

Детали

петок, 16 јули 2021

Србин преку оглас на Фејсбук ја бара симпатијата од Грција што за последен пат ја видел во август 1984-та година.

Момчило Милутиновиќ на Фејсбук страната Live from Greece објави стара фотографија од него и од неговата симпатија од Грција по која трага и која би сакал да ја види повторно.

Како што вели, фотографијата била направена додека го испраќала кога си заминувал во Југославија во август 1984-тата година во парк во Ставрос.  

„Ме бакна во образ и ми стави сребрено ланче на вратот што имаше приврзок со знакот Водолија...
Ми кажаа по многу години некои од нашите заеднички пријатели
Дека долго шетала во паркот и плачела.
Седнала на клупата до морето... и не можела да плаче повеќе, па гледала во мирното море“ – вели тој.

Момчило додава дека девојката се викала Димитракула, пријателите ја викале Димитра, а тој ја викал Кула. Таа имала куќа во Ставрос и во Солун и побара доколку некој ја види или ја препознае, да го информираат.

Во претходна објава на неговиот личен профил на Фејсбук, Момчило повторно ја објавил истата фотографија до која објавил своја песна: „Прв пат научив Те сакам (Sagapo)“ – стои во првиот стих на песната.

Досега неговата објава имаше бројни коментари. Голем број од корисниците на групата велат дека ќе се обидат да му помогнат да ја најде девојката, односно жената што му била прва љубов. Повеќето велат дека целосно го разбираат и дека првата љубов не се заборава.

Б. С. Б. | Црнобело