Давид (33), кој Скопје го замени со Раштак, го прослави роденденот со домашни пити и производи од своите кози

Детали

среда, 17 мај 2023

„Времето беше лигаво, а патот до мојата ‘игротека’ каллив и отежнат, но беше убаво... Кој кршеше јајца за со ракијата, кој вртеше ќебапи и колбаси за со пиво, па и скромна дегустација на млади сирења од млекото на моите кози - крем сирење со боров сируп, младо сирење со пелте од дуњи“, сподели Давид Неделковски од Скопје за својот уникатен 33-ти роденден.

Давид Неделковски од Скопје го замени животот во Скопје со живот во селото Раштак.

Тој се пресели таму за да чува кози со своето семејство.

Постојано го проширува својот бизнис, а сега го прослави и својот 33-ти роденден во рурален дух во природа со производи од млекото на своите кози.

Неговата објава на Инстаграм гласи:

„Kонечно се собрав после 3 дена иако не престанувам да си го премотувам филмот цело време, а немам славено роденден од средно.

Времето беше лигаво, а патот до мојата игротека каллив и отежнат, но кога веќе стигнавме и се закотвивме прерасна во вистинска пиратска тврдина.

Во китење на трпезата учествуваа сите по малку, кој кршеше јајца за со ракијата, кој вртеше ќебапи и колбаси за со пиво...

По некоја чашка и доживеав инспирација, па си поигравме и со скромна дегустација на млади сирења со што ги домаѓепсав другарите и другарките - крем сирење со боров сируп, младо сирење со пелте од дуњи и млада Калеш Мара со мед и кршен бибер.

И тоа не е сè, на голема радост имав чест и привилегија трпезата да ја красат и питите на Спасија во кои уживаат лондончани, подготвени од дома, а на лице место загреани и изуживани.

Ептен рокерски, на роденден со тепсии и мнооогу вкусно.

Сè беше во граница на цивилизирано однесување, главниот тест беше да ја симнеме храната по калта надолу, па кој тортата, кој питите и лебот и најважно звучникот од кој ечеше советска музика зашто изгледавме на партизани и во овој случај никој не падна, сите преживеавме.

Бидејќи заборавив да си замислам желба дури дував свеќи, си замислив на крај со едно прекрасно вино.

Ви благодарам на сите за честитките, искрените желби и добрината која ми ја испративте. Да сте живи и здрави“.

Прочитајте и Давид (30) од Скопје се пресели да чува кози на село: „Козите се мелем за душа, а цел ми е Раштак да го направам светски славно“

С. С. | Црнобело