Почина синот на Ферус Мустафов, познатиот кларинетист Илми Мустафов, три месеци по смртта на неговиот татко

Детали

среда, 16 август 2023

„Настапувавме заедно на свадба во Дебар пред некој ден со „Огнени момчиња“ и со Илми, беше сè нормално, никој не се посомнева дека такво нешто може да се случи. Во еден момент видов дека плаче, но искоментиравме со колегите дека тоа е поради смртта на неговиот татко“, вели пејачката Сузана Гавазова за смртта на познатиот музичар.

Неполни три месеци (22.05) по смртта на кралот на ромската музика, Ферус Мустафов, почина и неговиот син, кларинетистот и саксофонист, Илми Мустафов.

Илми почина на 15 август 2023 по кратко боледување, а неговата смрт ги остави во неверување колегите музичари и пријателите, кои се простуваат од него на социјалните мрежи.

Меѓу оние кои се простуваат од Илми е и пејачката Сузана Гавазова.

„Илми Мустафов, синот на нашата легенда и кралот на саксофонот, Ферус, почина синоќа. Си замина толку брзо, толку ненадејно и зад себе остави опустошени срца, болка и тага.

Настапувавме заедно на свадба во Дебар пред некој ден со „Огнени момчиња“ и со Илми, беше сè нормално, никој не се посомнева дека такво нешто може да се случи.

Во еден момент видов дека плаче, но искоментиравме со колегите дека тоа е поради смртта на неговиот татко. Илми си замина прерано.

Ќе ни недостигаш многу. Почивај во мир пријателе“, напиша таа и сподели заедничка фотографија на Фејсбук.

Илми беше долгогодишен член на музичката група „Огнени момчиња“, и врвен музичар како неговиот татко.

А. Ј. | Црнобело