Стоечки овации за Васил Гарванлиев по магичната ноќ во Куршумли Ан – ја разнежни публиката на концертот во Скопје

Детали

среда, 13 септември 2023

Пејачот Васил Гарванлиев вчеравечер (12.09) одржа емотивен концерт во Куршумли Ан во Скопје. Пред скопската публика, тој го почна своето музичко патување кое ќе продолжи во Струмица утревечер (14.09), а потоа со проектот ќе има турнеја низ неколку градови во САД и Канада.

Куршумли Ан вчеравечер беше вистинска магија. Наместо на класична бина, музичарите беа распоредени во централниот дел на објектот, а публиката седната насекаде околу нив, со што се создаде интимна атмосфера и блискост меѓу Васил и сите што дојдоа да го слушнат во живо.

Концертот го почна со „Ѓердан“, песната со која пред пет години, во 2018-тата, се врати на сцената.

Веднаш потоа ја испеа и „Желба од срце“, првата песна во неговата кариера, која ја пееше пред 30 години на детски фестивал.

„Затворете ги очите, силно, и замислете си по една желба. И внимавајте што посакувате, бидејќи желбите навистина се исполнуваат кога нешто сакате премногу“, кажа Васил додека пееше и причека присутните да затворат очи и да си замислат желба, а дури потоа да ја заврши песната.

По ова се редеа некои од неговите омилени македонски песни, од „Чија си“ и „Си заљубив едно моме“, до „Километри“ од Лозано и „Зајди, зајди“.

По секоја песна публиката го наградуваше со громогласен аплауз, а Васил не ја симнуваше насмевката од лицето додека пееше и не криеше дека и самиот ужива во концертот.

„Инспириран од дождот и песничката Rain Rain Go Away, напишав музика за песна. Му ја дадов на Робин Зимбаков да напише текст. Јас го слушнав дождот, Робин го слушна ветерот и од тоа се роди „Крајот“.

Песната треба да ја снимам наскоро, но сакав вечерва премиерно да ја испеам пред вас“, кажа Васил во еден момент.

Тој ги отпеа и евровизиските „Here I Stand“ и „You“, преработката на „Јовано Јованке“, а концертот го заврши со песната за која рече дека му е најомилената од сите македонски песни „Параходот“.

За цело време беше придружуван од хор и танчарки, кои го направија визуелниот впечаток уште посилен. Васил цело време се движеше низ публиката, комуницираше со нив, играше, направи вистинско шоу.

Публиката го испрати со стоечки овации и желба наскоро да се случи ново музичко дружење.

Меѓу оние кои уживаа на концертот беа и манекенката Катарина Ивановска, музичарите Тамара Тодевска, Јана Бурческа, Ивона Јо, Марио Арангеловски, Даниел Данн, моделот и музичар Давид Мука и многу други.

Концертот во Куршумли Ан беше бесплатен, но на неколку места беа поставени кутии за донации, а собраните средства ќе бидат донирани на дечиња од ранливи категории.

Повеќе фотографии од концертот на Васил на следната страница...