Виктор Апостоловски за родниот град: „Битола е град со душа, 99% од сите парови тука прво се виделе на Широк Сокак“

Детали

петок, 29 септември 2023

„Неизбежен дел од Битола е Широк Сокак. Тука има спомени, приказни, крај немаат. 99% од сите парови во градот, прво се виделе на Широк Сокак. Првото кафе го испиле таму, првата прошетка ја направиле, таму ќе ги шетаат и нивните деца, па и внуци“, вели Виктор Апостоловски во серијалот „За мојот роден град“ за CRNOBELO.com.

Музичарот Виктор Апостоловски е горд битолчанец. Иако долги години живееше надвор од градот, се врати дома, па во семејната куќа направи музичко студио, но тука почна да создава и дом со својата сопруга Милена.

Вели, каде и да оди, секогаш ќе се враќа дома, бидејќи Битола и битолчани имаат огромна душа.

Во искрен муабет, тој ни раскажа кои се работите кои ги сака најмногу и кои секогаш му будат убаво спомени во неговиот роден град.

Виктор со љубов говори за Битола за CRNOBELO.com:

„Прва работа - дома! Не знам како да го опишам тоа чувство, тој феномен, ама кај и да одиш, колку долго и да седиш, секој пат кога возиш накај дома, особено кога ќе стигнеш пред влезот на Битола, чувството е преубаво.

Се полни душата. И хаос невиден да е во моментот, дома си е дома. Тука ти е семејството, тука ти се луѓето, сè е тука.

Втора работа - лезет! Значи сум живеел години во Скопје, сум бил некое време и низ други далеку поголеми градови низ Европа, и ако нешто не сакам, тоа е гужвата, особено во сообраќајот. Сите некаде брзаат, сите се нервозни, цело време некој хаос се случува.

Ама затоа во Битола е сè обратно. Сите се како забавена снимка. Никој никаде не брза, но иако се случува некогаш гужва, ретко има застој. Нема хаос, нема нервоза, освен ако некој претерано се влечка - е тоа е веќе друго.

Трета работа - Пелистер! Знам дека сите имаат некакви планини во близина на својот град и секоја си има свои убавина, ама Пелистер си е Пелистер!

Природата, погледите, чувството кога ќе се качиш горе и ќе ги наполниш градите со свеж чист воздух... Убавини!

Четврто - Широк Сокак! Неизбежен елемент од секое спомнување на Битола е Широк Сокак. Тоа не е само обичен сокак. Тука има спомени, приказни, крај немаат.

Од кафулиња до кафеани, до заљубувања, слави, веселби, протести и што уште не. 99% од сите парови во градот прво се виделе на Широк Сокак.

Првото кафе го испиле таму, првата прошетка ја направиле, таму ќе ги шетаат и нивните деца, па и внуци. Широк е тој сокак. И полн љубов!

Петтото нешто што би го наброил се сите други места и спомени што ги има секој битолчанец.

Саат кулата, Тумбе кафе, паркот, Нижеполе, Хераклеја, Драгорот и уште многу други.

Места кај што секој битолчанец бил и има некакви спомени. Не сме некој огромен град по број на жители или површина, ама имаме огромна душа.

Е, тоа е тоа што најмногу ми се допаѓа и што секогаш ме влече дома“.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело