Славчо Поповски, метеоролог: „Неделава ќе има повеќе сонце, но од петок повторно се очекува дожд и снег“

Детали

понеделник, 18 декември 2023

„Времето ќе биде стабилно, суво и со повеќе сонце, особено на повисоките места и на планините, додека по одделни котлини и речни долини ќе има појава на магла и на ниска облачност, и истата локално се очекува да биде густа“, вели метеорологот Славчо Поповски.

Викендов, па и утрово, веќе почнаа да се чувствуваат зимските температури, а покрај врнежите од дожд, на некои места, особено повисоките, имаше и снег.

Според метеорологот Славчо Поповски, неделава ќе има повеќе сонце, но на пониските места може да се појави и густа магла.

Целата прогноза на Славчо во продолжение:

„По најновиот снежен бран кој ја зафати Македонија и направи многу проблеми, од денес до четврток силен Азорски антициклон ќе ја зафати нашата територија.

Времето ќе биде стабилно, суво и со повеќе сонце, особено на повисоките места и на планините, додека по одделни котлини и речни долини ќе има појава на магла и на ниска облачност, и истата локално се очекува да биде густа.

НАПОМЕНА: Маглата и ниската облачност понекаде во котлините ќе се задржи и преку ден, со што и температурите на воздухот ќе останат ниски.

Во Скопје и околината исто така ќе имаме стабилно и суво време, но во котлината ќе се создаваат услови за појава на магла и на ниска облачност, кои би можеле да се задржат и преку целиот ден, со што и температурата ќе остане пониска.

Токму поради ова и поради можната намалена видливост, на возачите им препорачуваме да бидат крајно претпазливи.

Што се однесува до температурите, тие наутро речиси насекаде остануваат под нулата, а максималните дневни температури ќе бележат тенденција на пораст и ќе се искачуваат во интервалот од 2 до 11 степени.

Барем според моменталните анализи со кои располагаме, нов бран на врнежи од дожд и снег се очекува од петок“.

Спирова С. | Црнобело

фото: Фејсбук, freepik.com