Денес се слави Свети Никола Чудотворец – Заштитник на домот и на сиромашните

Детали

вторник, 19 декември 2023

Свети Никола е најчестата слава во македонските домови. Се верува дека овој светец е заштитник на домот и на сиромашните, а именден слават: Никола, Коле, Николај, Ники, Николина...

Православните христијани на 19-ти декември го слават празникот Свети Николај Чудотворец. Вечерта помеѓу 18-ти до 19-ти се подготвува посна вечера, наречена „заслуг“ што најчесто се состои од посна трпеза на која најчесто има гравче, риба и леб.

Според некои верувања, во домот не треба ништо да се прави ден пред и по славата, а храната што ќе се служи за време на вечерата да биде подготвена еден ден претходно.

Свети Николај или Свети Никола, уште е познат и како Никола Чудотворец, или Архиепископ Мираклиски.

Свети Никола бил син единец на своите богати и угледни родители, Теофан и Нина, и живеел во градот Патара во Ликија.

Затоа што им бил син единец, даруван од Бога, тие одлучиле детето својот живот да му го посвети на Бога.

Знаењето за духовниот живот Никола го стекнал преку својот чичко Николај, епископот Патарски и се замонашил во манастирот „Новиот Сион“, а по смртта на своите родители, целиот свој имот го раздал на сиромашните и ништо не задржал за себе.

Затоа, денес се смета дека Свети Никола е заштитник на домот, на сиромашните и кај нашиот народ многу често се слави како куќна слава. За неговото име се врзувале легенди дека тајно ги дарувал сиромашните, често оставајќи пари во чорапи или во чевли.

Оваа приказна за неговата големина и добродушност еволуирала и помогнала да се создадат легендите за Дедо Мраз.

Исто така, се верувало дека Свети Никола многупати ги спасувал изгубените бродови, па затоа се смета за заштитник на морепловците, рибарите и бродовите.

Подеднакво го слават и православните и католиците, но и протестантите.

Освен како слава, Свети Никола се слави и како именден на Никола, Николај, Коле, Ники, Николина...

Б. С. Б. | Црнобело / фото: depositphotos.com