Филип од Скопје ја запроси Ена на ски-патека во Австрија: „Доктор помисли дека сме повредени, веднаш дојде до нас“

Детали

вторник, 16 јануари 2024

„Живееме на иста улица во Капиштец, еден спроти друг. Си гледаме од прозор во прозор. Се знаеме од мали, но поради разликата во генерации никогаш се немаме дружено. Официјално се запознавме кога Филип ме виде во еден скопски локал и ми пиша на Инстаграм“, раскажува Ена од Скопје.

Ена Благоева (29) и Филип Димишковски (36) од деца живеат еден спроти друг во населбата Капиштец во Скопје. Се познаваат целиот свој живот, но никогаш не се дружеле.

Но, сето тоа се сменило пред 3 години, кога се сретнале во локал во Скопје и ја почнале нивната љубовна приказна.

А, токму на тригодишнината, додека беа на скијање во Австрија, Филип клекна на колено и ја побара Ена за сопруга.

Таа за CRNOBELO.com раскажа за изненадувањето што ѝ го приредил додека биле на зимување во Кицбиел, Австрија, но и за почетокот на нивната љубовна приказна, која била во стилот на Јулија и Ромео:

„Со Филип сме во врска точно 3 години, на 14 јануари ни беше годишнина од запознавањето.

Ние двајца живееме на иста улица во Капиштец, еден спроти друг. Неговата куќа е паралелна со мојата зграда. Си гледаме од прозор во прозор.

Се знаеме од мали, ама поради разликата во генерации никогаш се немаме дружено во маало.

Официјално се запознавме кога Филип ме виде во еден скопски лаунџ бар и ми пиша на Инстаграм: 'Кај си бе, Јулија?', демек Ромео и Јулија.

Запросувањето се случи додека бевме на скијање во Кицбиел, Австрија, на ски-патека.

Јас решив да го снимам како вози затоа што времето беше многу убаво, а тој одеднаш клекна и го извади прстенот на среде патека.

Не очекував воопшто. Имаме зборувано за иднината, ама ништо конкретно.

Потоа нè сликаше лекар-скијач кој мислеше дека сме повредени, па застана до нас.

Филип вели дека немал воопшто трема. Според него, тој од првиот ден знаел дека јас сум вистинската. Само, како што вели, чекал малку да пораснам.

Јас, пак, бев прилично изненадена и мнооогу среќна, со еден збор фасцинирана.

Ние двајцата буквално живееме за скијање и бордање и баш ме радува што го избрал овој момент за да ме запроси.

Откако ме побара за сопруга, прво им соопштивме на родителите и на старосватицата Ивана, а потоа на другарките и другарите.

Засега немаме планови за свадба, но сигурно ќе биде нешто во урбан, кул стил“.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело